«Jasyl ekonomıkany» damytý jáne jańartylatyn energııa kózderine sheteldik ınvestısııalardy tartý perspektıvasy týraly QR-daǵy Amerıka saýda palatasynyń (ATP) atqarýshy dırektory Dorıs Bredbıýrı, QR-daǵy ATP prezıdenti Kennet Mak, EYDU jahandyq qatynastar jónindegi hatshylyǵynyń Eýrazııa bóliminiń basshysy Ýılıam Tompson, Qazaqstanda akkredıttelgen Ulybrıtanııa elshisi Ketı Lıch, EO elshisi Kestýtıs Iаnkaýskas, Nıderlandy elshisi Haıme de Býrbon, EO janyndaǵy Kanadanyń arnaıy elshisi Stefan Dıon, sondaı-aq GE, Total Energies, Orano Group Kazakhstan (KATCO), Eurasia Group kompanııalardyń ókilderi jáne t. b. baıandama jasady.
Qabyldanyp jatqan sharalar týraly ekologııa, geologııa jáne tabıǵı resýrstar mınıstri Serikqalı Brekeshev, energetıka birinshi vıse-mınıstri Murat Júrebekov baıandady. Ekonomıkany dekarbonızasııalaý jáne klımattyń ózgerýine beıimdeý, QR-da eń ozyq qoljetimdi tehnologııalardy engizý, jańartylatyn energııa kózderin, naqty eginshilikti jáne jalpy «jasyl» ekonomıkany damytýǵa ınvestısııa tartý máseleleri talqylandy.
Úkimet basshysy Qazaqstan klımattyń ózgerýine qarsy jahandyq kúres aıasynda óz mindettemelerin iske asyrý boıynsha sharalardy ulǵaıtyp jatqanyn atap ótti. Bul rette kúsh-jiger ekonomıkanyń turaqtylyǵy men dekarbonızasııasyn arttyrýǵa baǵyttalǵan.
QR Parıj kelisimin iske asyrý úshin 2030 jylǵa qaraı Úkimet parnıktik gazdar shyǵaryndylaryn 15%-ǵa azaıtýdy targetteıdi. Qoıylǵan maqsatqa qol jetkizý úshin Qazaqstan ulttyq deńgeıde aıqyndalatyn shyǵaryndylardy azaıtý jónindegi úlesin jańartty jáne 2022-2025 jyldarǵa arnalǵan tıisti Jol kartasyn ázirledi.
«Úkimet sonymen qatar 2020 jyldyń jeltoqsan aıynda klımattyq ambısııalar boıynsha BUU sammıti aıasynda QR Prezıdenti Qasym-Jomart Toqaev jarııalaǵan Qazaqstannyń 2060 jylǵa qaraı kómirtekti beıtaraptylyqqa qol jetkizý maqsatyn iske asyrý úshin tájirıbelik sharalar qabyldaýda. 2060 jylǵa deıin QR kómirtegi beıtaraptylyǵyna qol jetkizý doktrınasyn ázirleý júrgizilýde, ol bıyl qarasha aıynda Glazgo qalasynda klımattyń ózgerýi jónindegi BUU konferensııasynda usynylatyn bolady. Qujatta QR ekonomıkasynyń energetıkalyq tıimdiligin arttyrý, elektrlendirý jáne jańartylatyn energııa kózderin keń aýqymdy paıdalaný sharalary kózdelgen», dedi A. Mamın.
Premer-Mınıstr Úkimettiń energııa óndirýdiń jalpy kólemindegi jańartylatyn energııa kózderiniń úlesin buryn josparlanǵandaı 2025 jylǵa qaraı emes, 2023 jylǵa qaraı 6%-ǵa deıin eki ese arttyrýǵa nıetti ekenin atap ótti. Úkimet basshysy Qazaqstannyń balamaly energetıkany damytý salasyna sheteldik kapıtal men ozyq tehnologııalardy tartý úshin ınvestısııalyq ortany jaqsartý jóninde birqatar sharalar qabyldaǵanyn jetkizdi.
Nátıjesinde, 2020 jyly jańartylatyn energetıka salasynda jalpy qýaty 600 MVt jýyq bolatyn 25 joba paıdalanýǵa berildi. Investısııa kólemi $510 mln asty. Aldaǵy tórt jyl ishinde jalpy qýaty 2400 MVt bolatyn jáne ınvestısııa kólemi $2,5 mlrd astamdy quraıtyn 60-tan asa jańa JEK jobasyn paıdalanýǵa berý josparlanýda.
Qazirgi ýaqytta Qazaqstanda belgilengen qýaty 1922 MVt bolatyn 124 JEK obektisi jumys isteıdi: 31 jel elektr stansııasy, 48 kún elektr stansııasy, 40 sý elektr stansııasy, 5 bıoelektr stansııasy.
