Qalypty tártippen jumys isteýde

Qazaqstan teńgesiniń valıýta baǵamyna qatysty ózgerisi jónindegi habar qulaǵymyzǵa tıisimen, oblys ortalyǵy Kókshetaýda ornalasqan ekinshi deńgeıli bankterdi túgel derlik aralap shyqqanbyz. Qarjy mınıstrligi men Ulttyq bank basshylarynyń Astana jáne Almaty qalalarynda ótkizgen brıfıngterinde AQSh-tyń 1 dollaryn 185 teńgeden artyq satýǵa bolmaıtyndyǵy aıtylǵanymen, árkim ózinshe at aıdaıtyn ahýal baıqaldy. Máselen, «Kazkommersbank­tiń» Kókshetaýdaǵy fılıalynyń kórsetkish taqtasynda dol­lar­dyń 189 teńgege satylaty­ny,­ al bir dollardy 181 teń­ge­den satyp alatyndyǵy jazylyp qoıylypty. Biraq, bul­ taqta kádýilgideı dalada, jurt­ kózine túsetindeı jerde emes, ǵımarattyń ishki jaǵyna aýys­ty­rylǵan. «BTA bank» 1 dollardy 182 teń­geden satyp alyp, 188 teń­geden saýdalap jatyr. Bas ǵımarattaǵy kassır Gaýhar Beısenbaeva bul baǵamnyń saǵat 15.30-da ilip qoıylǵanyn aıtady. Sodan beri onyń qyz­me­tine eshkim júginbegen. Aýyt­qý­shylyqtyń mánisin bilmek bo­lyp valıýtalyq baqylaý me­nedjeri Dınara Baıahınanyń aldyna barǵanbyz. Áıtkenmen, ol qandaı da bir túsinik berýge ókilettigi joqtyǵyn aıtty. Bank dırektory osy másele boıynsha Ulttyq banktiń bólimshesindegi májiliske ketken kórinedi. Al, dırektordyń orynbasary Qaırat Qabdirashıtov áli naqty nusqaýdyń kelip túspegenin aldymyzǵa tartty. Jalpy, onyń paıymy búgingi ózgeriske qatysty tirek deńgeıi bar, biz ony buzyp otyrǵan joqpyz degenge keledi. Demek, Kókshetaý qalasyndaǵy – 3, aýdandardaǵy 6 aqsha aıyrbas­taý pýnkti osy tártippen jumys istep jatqany anyq. «Sesnabank» fılıalynda dollarǵa qatysty bul baǵam satyp alý – 185,5, satý 188 teńgeden bolyp shyqty. Aqparattyq taqta osylaı dep turǵanymen kassır Gúlmıra Áshimova óz ornynda emes, jalpy kassada jumys istep otyrǵany tańǵaldyrady. Bankke kireberistegi Rıza atty menedjer qyzdan basshylardyń eshqaısysy ornynda emestigin bildik. Bankterdiń qudaıǵa qaraǵany «Nur Bank» bolyp shyqty. Olar AQSh aqshasyn 183,5 teńgege satyp alyp, 185,5 teńgege saýdalap otyr. Al, «Temirbank» pen «Poshtabanktiń» aqparattyq taqtalary bos tur. Kókshetaýdaǵy jekemenshik aqsha aıyrbastaý pýnktteriniń deni ortalyq bazar aýdanynda ornalasqan. Kóbisi jabyq tur. «Vavılon» dúkenindegi pýnkt­ten dollardy 185 teńgege ótkizip, 187 teńgeden satyp alýǵa bolatynyn bildik. Al, «Astana» dúkenindegi atyn aıtýdy qalamaǵan menshik ıesi 1 dollardy 185 teńgeden satyp alyp, 189 teńgeden satý nıetinde eken. Biraq, baǵam aýysqan boıda turaqty klıentterdiń ózi kelmeı qoıǵanyn aıtady. «Rıo» saýda, oıyn-saýyq orta­lyǵyndaǵy aıyrbas­taý pýnk­tin­degiler dollardy 170 teńgeden de sata almaı otyrǵandyǵyn málimdedi. «Shyǵynǵa batatyn boldyq» degendi de aıtyp jatyr. Baqbergen AMALBEK, «Egemen Qazaqstan». Aqmola oblysy.