Tól sporttyń tarlandary

Tól sportymyzdyń kókpar, alaman báıge, teńge ilý, aýdaryspaq, jamby atý, qazaq kúresi, toǵyzqumalaq, asyq atý syndy túrleri boıynsha 8 myń­ǵa jýyq adam baq synaǵan saıys ko­mandalyq tártippen ótti. Tamyz aıynda bastalyp, qara kúzge deıin eki aıǵa jýyq ýaqytqa sozylǵan, kórermen halyqtyń qanyn qozdyrǵan dúbirli dodaǵa elimizdiń 14 oblysynyń jáne eki qalasynyń komandalary qatysty.

Sonymen qazaq kúresinen jáne kókpar tartýdan Jambyl oblysynyń balýandary basym tústi. Aýdaryspaq pen teńge ilýden, sondaı-aq jamby atýdan, asyq oıynynan Túrkistan oblysynyń sportshylaryna teń keler qarsylas tabylmady. Batys Qazaqstan oblysy bolsa toǵyzqumalaqtan jeńimpaz atandy.

Balýan bilekti, temir taqymdy, epti jigitterdiń jarysynda erekshe kóz­ge túsken jeńimpazdar men júl­de­gerler syılyqsyz qalǵan joq. Ult­tyq sport federasııalary men Ult­tyq sport túrleri qaýymdastyǵy jeke­leı sportshylar men komandalardy qarjylaı jáne basqa da baǵaly syılyqtarmen marapattady. Temir tulparǵa ıe bolǵandar da bar.

Ulttyq sport túrleri qaýym­das­­­tyǵynyń prezıdenti Bekbolat Tileý­han:

– Jamby atý federasııasynyń prezıdenti Nurlan Ámetov myrza je­ńimpazǵa arnaıy temir tulpar min­gizdi. Biz de qaýymdastyq atynan te­mir tulpar atadyq. Sol kezde bizdiń sport­shylarymyzdyń kózi burynǵydan da qattyraq janyp, jarysqa erekshe yjdaǵatpen, yqylaspen kiristi. Fes­tıval úlken tabyspen ótti. Ke­­lesi jarystarda jamby atýdan naǵyz mer­gender, teńge ilýden naǵyz saıyp­qyrandar boı kórsetetinine kúmánim joq, – dedi .

Otyzjyldyq torqaly toıǵa oraı­lastyrylǵan ulan-ǵaıyr sport sharasyn uıymdastyrýǵa Mádenıet jáne sport mınıstrligi Sport jáne dene shynyqtyrý isteri komıtetine qarasty «Ulttyq jáne at sporty túrleri orta­lyǵy» RMQK muryndyq bolǵanyn aıta keteıik. Eki jylda bir márte ótki­ziletin dodanyń dúbiri bıyl erekshe bolǵany anyq.