Nátıjesinde, ata-analar balalardyń bos ýaqytyna bola alańdamaı, jergilikti atqarýshy organdardyń qoldaýymen ashylǵan tegin seksııalar men mektepten tys úıirmelerge qatystyra alady. Qala ákiminiń orynbasary Erjan Babaqumarov Prezıdenttiń buqaralyq sportty damytý týraly tapsyrmasyn iske asyrý maqsatynda balalardyń salamatty ómir saltyn ustanýyna barynsha jaǵdaı jasalyp otyrǵanyn jetkizdi. Eski fýtbol alańdaryn jańǵyrtyp, zamanaýı sport keshenderin salý da osy baǵytta qarastyrylyp otyrǵan mindetter. Balalardyń kásibı, sondaı-aq buqaralyq sportpen aınalysýyn qamtamasyz etý maqsatynda byltyrdan bastap mektepter janyndaǵy sport aımaqtarynyń ınfraqurylymy jetildirilýde.
Osy oraıda bıyl barlyǵy 61 mektep janyndaǵy sport nysandaryn jańǵyrtý josparlansa, onda 73 fýtbol, 63 voleıbol jáne basketbol alańdary, sondaı-aq vorkaýt-aımaqtar men júgirý joldary bar. Bul alańdarda kásibı mamandarmen jattyǵý jaǵy da qarastyrylǵan. Nátıjesinde, balalardyń sportqa degen yntasynyń arta túsetini sózsiz. Qazirgi kezde memleket-jeke menshik áriptestik aıasynda 8 sport alańy qalpyna keltirilýde. Onyń ishinde 4 stadıonnyń jumysy aıaqtalyp, qalǵan qurylys-montajdaý nysandary osy jyldyń jeltoqsanyna deıin berilmek. Jalpy, 8 joba boıynsha ınvestısııa somasy 400 mln teńgeden asady. Osy oraıda barlyq qurylyp jatqan ınfraqurylym memleket menshiginde ekenin atap ótý qajet. Qalada 4 jastan 18 jasqa deıingi balalarǵa arnalǵan tegin seksııalar sporttyń 71 túri boıynsha memlekettik tapsyrys aıasynda júzege asyp keledi. Búginde 24 myń ótinish berýshige vaýcher tabys etilip, 18 630 bala sporttyń 26 túri boıynsha shuǵyldanýda. Eń tanymal seksııalardyń qataryna fýtbol, taekvondo, karate, júzý, dzıýdo kiredi. Al 2023 jylǵa qaraı ortalyqtar sanyn 200-ge deıin jetkizý josparlanǵan.
