Qazaqstannyń vaksınalaý pasportyn moıyndaǵan memleketterdiń ishinde Armenııa, Argentına, Belarýs, Vengrııa, Grýzııa, Iran, Qyrǵyzstan, Moldova, Mońgolııa, San-Marıno, Taıland, Túrkııa men Estonııa bar.
Osylaısha, qazaqstandyqtar da, osy elderdiń azamattary da memlekettik shekarany karantındik shekteýsiz óte alady. Ol úshin koronavırýsqa qarsy vaksınalaý pasportyn kórsetse jetkilikti.
PTR-test tapsyryp, karantınde otyrýdyń da qajeti joq. Qazaqstan azamatynyń qandaı ekpe saldyrǵany da mańyzdy emes. Eń bastysy, vaksınalaý pasporty bolýy shart.
Al Mysyr men Oman qazaqstandyqtardyń vaksınalaý pasportyn birjaqty retpen tanydy. Ol jaqqa barǵan otandastrymyzǵa da PTR-test tapsyrý jáne karantınde otyrý talaby qoıylmady.
Qazirgi kezde Reseı, Ázerbaıjan, Iordanııa, Indonezııa, Marokko, О́zbekstan, Fılıppın jáne taǵy basqa memlekettermen vaksınalaý pasportyn ózara taný boıynsha kelissózder júrgizilip jatyr.
Qazaqstan moıyndaǵan elderde koronavırýsqa qarsy vaksınanyń túr-túri egiledi. Sonyń ishinde QazVac (qazaqstandyq vaksına), «Spýtnık V» (reseılik vaksına), «Spýtnık Laıt» (reseılik vaksına), Vero Cell, CoronaVac (qytaılyq vaksınalar), AstraZeneca (aǵylshyn-shved vaksınasy), Novavax, Pfizer, Moderna, Johnson&Johnson (amerıkalyq vaksınalar), COVIran Barakat (ırandyq vaksına).
Aıta keteri, vaksınalaý pasportyn ózara taný sharalarymen syrtqy ister mınıstrligi aınalysady. Aldymen kelissózder júrgiziledi. Odan keıin eki memleket nota almasyp, vaksınalaý pasportyn tanýǵa kelisedi. Budan bólek, bas memlekettik sanıtar dáriger ózge elde berilgen vaksınalaý pasportyn tanýǵa ruqsat bere alady.
