Aımaqtar • 25 Qazan, 2021

Shymkent tarıhy IýNESKO deńgeıinde talqylandy

90 ret kórsetildi

Shymkent qalasynda «Uly Jibek joly tarıhyndaǵy Shymkenttiń IýNESKO mádenı mura júıesindegi orny men róli» taqyrybynda eki kúnge josparlanǵan halyqaralyq kezdesý jıyny ótýde, dep habarlaıdy Egemen.kz.

Is-sharany Qazaqstan Respýblıkasynyń IýNESKO jáne ISESKO isteri jónindegi Ulttyq komıssııasynyń qatysýymen, QR Mádenıet jáne sport mınıstrliginiń, Qazaqstan, Qyrǵyzstan, Tájikstan jáne О́zbekstan boıynsha Almatydaǵy IýNESKO Klasterlik Bıýrosynyń qoldaýymen qala ákimdigi uıymdastyryp otyr.

Kezdesýge Ortalyq Azııa elderiniń belgili tarıhshylary men arheologtary, Mádenıet jáne sport mınıstrliginiń sarapshylary, Auezov University ǵalymdary qatysyp, qalamyzdyń Uly Jibek joly tarıhyndaǵy rólin, onyń Ortalyq Azııa kartasyndaǵy biregeıligin jáne Shymkenttiń tarıhı nysandaryn IýNESKO-nyń Dúnıejúzilik mura tizimine engizý múmkindigin talqylaıdy.r

Is-sharanyń ashylý saltanatyna Shymkent qalasynyń ákimi Murat Áıtenov, Mádenıet jáne sport vıse-mınıstri Nurǵısa Dáýeshov, Almatydaǵy IýNESKO Klasterlik bıýrosynyń dırektory Krısta Pıkkat, QR IýNESKO jáne ISESKO isteri jónindegi Ulttyq komıssııasynyń Bas hatshysy Álııa Baısabaeva, «Jibek joly» jobasynyń úılestirýshisi, IýNESKO Dúnıejúzilik mura ortalyǵynyń Azııa-Tynyq muhıty sektorynyń basshysy Feng Djıng qatysyp, quttyqtaý sóz sóıledi.

Jıynda qazaq, orys jáne aǵylshyn tiline aýdarma júrgizilýde.

Búgin «Shymkent qalasynyń tarıhı retrospektıvasy jáne bolashaǵy», «Jibek jolynyń tarıhı mádenı keńistigindegi Shymkent» jáne «Shymkent qalasynyń arheologııasy, etnografııasy, mýzeıtanýy máseleleri» taqyryptarynda úsh plenarlyq sessııa ótedi.

26 qazan kúni Ferǵana-Syrdarııa segmentindegi kóp ultty Jibek joly nomınasııasy sarapshylarynyń kezdesýi jáne Shymkent aýmaǵyndaǵy nysandardy IýNESKO-nyń Dúnıejúzilik muralar tizimine engizý boıynsha vebınar josparlanǵan. Onyń nátıjesi boıynsha saraptamalyq qorytyndylar men nysandardy bedeldi tizimge engizý boıynsha usynystar jasalady.

Aıta ketsek, jıynǵa qatysýshylar «Shymqala» tarıhı-mádenı keshenine baryp, mýzeılendirý, konservasııalaý jáne renovasııalaý jumystarymen, eski qalany damytý jobasymen tanysty. Sonymen qatar, qonaqtar «Bes qarý» etnofestıvaliniń ashylýyna qatysyp, sýretshi Saıd Atabekovtyń qarý-jaraq kórmesi men fotoekspozısııasyn tamashalady.

Sońǵy jańalyqtar

Almaty qalpyna keltirilýde

Aımaqtar • Keshe

Dalanyń dara kúıshisi

О́ner • Keshe

Uqsas jańalyqtar