Memleket basshysynyń bastamalary qalaı iske asyp jatqanynan habar beretin «Aıtyldy – Oryndaldy» aıdarymen beriletin aqparattyń bul jolǵy derekteri «kóleńkeli» ekonomıkamen kúreske arnaldy. Prezıdent bul máseleni bıylǵy Joldaýynda erekshe nazarǵa alǵan bolatyn.
«Salyq jáne keden salasyn sıfrlandyrý «kóleńkeli ekonomıkanyń» kez kelgen kórinisterimen kúresýge aıtarlyqtaı kómektesedi. Tipti, «kóleńkeli ekonomıka» sybaılas jemqorlyqqa jol ashyp otyrǵany jasyryn emes. Sondyqtan Ekonomıkalyq tergeý qyzmetiniń jumysyn negizinen «kóleńkeli ekonomıkamen» kúresýge beıimdeýdi tapsyramyn», degen bolatyn Memleket basshysy.
Berik Ýálı keltirgen derek boıynsha, jyl basynan beri 1508 ekonomıkalyq quqyqbuzýshylyq anyqtalǵan. Onyń 803-i aýyr jáne asa aýyr qylmystarǵa jatady.
«36 uıymdasqan qylmystyq toptyń joly kesildi. Onyń ishinde 27 top jalǵan shot-faktýra jasaýmen, qolma-qol aqsha alýmen aınalysqan jáne salyqtan jaltarǵan. «Zań buzý yqtımaldyǵy joǵary tulǵalar reestrine» qolma-qol aqsha berýshi fırmalarmen ózara esep aıyrysqan 2,8 myńnan astam zańdy tulǵa engizildi. 1 myńnan astam kompanııanyń banktegi shottary boıynsha qarjy jumsaý operasııalary ýaqytsha toqtatyldy», dep jazdy Prezıdenttiń baspasóz hatshysy.
Onyń aıtýynsha, qarjy pıramıdalarynyń belgilerin aldyn ala anyqtaý jumystary kúsheıtildi.
«Osy arada jalpy mólsheri 4,1 mlrd teńge qarjy salý boıynsha 30 derek anyqtaldy. Salyq jáne kedendik basqarýdy odan ári jetildirýge, qolma-qol aqshasyz tólem jasaýdy damytýǵa, qolaıly bıznes orta qalyptastyrýǵa baǵyttalǵan jańa Keshendi jospar bekitildi. Sońǵy 4 jyldyń ishinde elimizdegi «kóleńkeli» ekonomıkanyń deńgeıi 29 paıyzdan 20 paıyzǵa deıin tómendedi», dep jazdy Berik Ýálı.
