Eskertkish-bıýstiń ashylý rásimine Almaty qalasynyń ákimi Baqytjan Saǵyntaev qatysty.
«Elimizdiń tarıhynda óshpesteı iz qaldyrǵan Nurtas Dándibaıuly kóptegen ıgilikti isterdiń basy-qasynda bolyp, sonaý qıyn zamanda ult múddesi úshin batyl qadamdarǵa bara alǵan uly tulǵa. Qandaı joǵary laýazymdy qyzmette júrse de el táýelsizdigin, halyqtyń óz baılyǵyn ózi ıgerý isin, umytylýǵa aınalǵan ana tilimiz ben salt-dástúrimizdi qaıta tiriltý máselelerin bárinen de joǵary qoıdy. Uly Otan soǵysy men onan keıingi eń aýyr jyldarda Qazaqstan Úkimetin basqardy. Respýblıkamyzdyń áleýmettik-ekonomıkalyq damýyna, mádenıeti men óneriniń, ǵylymy men biliminiń órkendeýine barynsha kúsh saldy. Nurtas Ońdasynovtyń ónegeli ómiri men halqyna jasaǵan qaltqysyz qyzmetin nasıhattaý, jas urpaqtyń sanasyna sińirý – bizdiń abyroıly mindetimiz», dedi qala ákimi quttyqtaý sózinde.
Nurtas Ońdasynov soǵys jyldary Respýblıkamyzda Ǵylym Akademııasynyń derbes shańyraq kóterýine, Qazaq Memlekettik Qyzdar Pedagogıkalyq ınstıtýty men Ulttyq Konservatorııanyń ashylýyna, Shet tilderi, Dene tárbıesi ıstıtýttarynyń jáne barlyq oblys ortalyqtarynda muǵalimder daıarlaıtyn joǵary oqý oryndarynyń qurylýyna birden bir uıytqy bolǵan.
Sonymen qatar Nurtas Dándibaıuly elimizdegi iri qurylystardyń – Ertis-Qaraǵandy, Arys-Túrkistan, Myrzashól kanaldarynyń, Atyraý, Temirtaý, Jezqazǵan, Balqash, Aqtóbe qalalaryndaǵy iri zaýyttardyń, Moıynty-Shý temir jolynyń salynýyna tikeleı basshylyq etken tulǵa.
