Eski ápsana esti shyǵarmaǵa arqaý bolǵandaı. Týyndy mıfologııalyq janrǵa jatady. Tipti, oqyrman ejelgi flora men faýnanyń qudaılaryn eske túsirýi múmkin. Kompozısııanyń ortalyq beınesi – Qyzyr baba. Negizgi kýlt osy.
Qazaqy tanym sheńberinde Qydyr (Qyzyr) ata – halyqtyń qorǵaýshysy, qaıyrymdy áýlıe, kóripkel retinde elesteıdi. Halyq Ulystyń uly kúni ár úıdiń bosaǵasynan enip, aq batasyn berip, jaqsylyq alyp keledi dep oılaǵan. Sondyqtan ony jańarýdyń, jańa kúnniń sımvoly retinde qadir tutady. Sondaı-aq kóktemniń kelýi tek sonyń kelbetimen sıpattalady.
Sýretshi sýret ortasynda qart Qyzyr babanyń músinin beınelegen. Oń qolynda asataıaǵy bar, onyń ústine gúlder qulpyryp, ekinshi qolynan ózen aǵyp tur. Ańyzdardyń birinde Qydyr ata jerasty álemine barǵany aıtylady. Onda tiri sý kózin taýyp, sol sýdan iship, ólmeske aınalǵany týraly baıandalǵan.
Kelesi bir ápsanaǵa súıensek, Qydyr ata shól dalada tamaǵy qurǵap, ystyqtan ólip bara jatqan saıahatshylardy qutqaryp qalǵan eken. Shyǵarmada kenep boıymen sý aǵyndary tasyp jatqanyn baıqaımyz. Onyń sheshek atqan aǵashtardy, shyryndy shóptiń arasynda jaıylyp jatqan janýarlardy sýǵarýǵa kelgenin kóremiz. Ártúrli obrazda tirshiliktiń tamyrshysy retinde Qydyr ata kartınanyń mazmunyn jandandyryp tur.
Fonǵa kóz salsaq, baıtaq babanyń tórt túliktiń qamqorshysy ekenin anyq kórýge bolady. Zeńgi baba – sıyrdyń qamqorshysy, Shopan ata – qoıdyń qamqorshysy, Oısylqara – túıe qamqorshysy jáne Qambar ata – jylqylardyń qamqorshysy. Árqaısysynyń qasynda óziniń súıikti janýarlary beınelengen. Sýretshi jıyntyq beıne arqyly qazaqtyń eski ańyzyna jan bitiredi.
Kompozısııa keıipkerleri sımmetrııalyq túrde teńdestirilgen jáne kóleńke men jaryqtyń qarama-qaıshylyǵy baıqalady. Kartınadaǵy nysandardyń ólshemi mıfologııalyq janrdaǵy keskindemelerge saı jazylǵan.
