Bul ıgilikti iske muryndyq bolǵan Mádenıet jáne sport mınıstrligi Mádenıet komıteti men «Qazaqstan jastarynyń konventi» jeke qory. Jobanyń maqsaty – qolóner salasyndaǵy aýqymdy eńbek daǵdylaryn úıretý arqyly Qazaqstandaǵy áıelderdiń ekonomıkalyq jáne kásibı mártebesin kóterý.
Semınar onlaın formatta 4 kúnge sozyldy. Joba sheńberinde qolónershilerdiń turaqty eńbek daǵdylaryn alýy, kásipqoılyqty arttyrý, kóshbasshy áıelderdi anyqtaý, iskerlik baılanystardy keńeıtýge járdemdesý, daıyndalǵan qolóner buıymdaryn jergilikti jáne halyqaralyq naryqtarda odan ári ilgeriletý kózdeldi.
Semınar sabaqtarda daıyndalatyn qolóner buıymdary bólshekteriniń túrleri jáne jasaý tehnıkalarynyń ádisteri keńinen túsindirilip, tolyqtaı aqparat berildi. Atap aıtqanda, «shym shı», «keptirý», «jumsaq keskindeme», «plastıkalyq quraq» tehnıkalary arqyly buıym jasaý isteri qyz-kelinshekterdi qatty qyzyqtyrdy. Qatysýshylar kádesyı, moıynǵa taǵatyn alqalar, ádemi tanamonshaq, sándi túıreýish, jumsaq keskindemeden kartınalar, zamanaýı trendterden shopper jáne eko sómkeler jasaýdy tolyqtaı meńgerdi.
Jalpy, onlaın semınarǵa respýblıkamyzdyń 15 óńirinen 150-den astam kópbalaly ana, jumyssyz áıel, sýretshi-dızaıner, dızaıner, sándik-qoldanbaly ónertanýshy jáne qolónershi qatysty.
Jobany iske asyrýǵa Qazaqstan Sýretshiler odaǵynyń múshesi, qoldanbaly óner sheberi Álııa Qanybekova, sýretshi-dızaıner Gúlmaral Tátibaeva, dızaıner Natalıa Lıgaı, ónertanýshy Natalııa Bajenova bastaǵan birneshe ónertanýshy atsalysty.
Semınar sońynda barlyq qatysýshyǵa arnaıy sertıfıkattar tabystaldy.
