Qazaqstandyq jáne halyqaralyq júgirý marafondaryna turaqty qatysatyn Saltanat Túıitbaev AQSh-tyń Nıý-Iork qalasynda ótken halyqaralyq marafonyn da qalt jibermeı, kópshilikpen birge 42 shaqyrym 195 metrdi júgirip ótti.
«Nıý-Iork marafonyna qatysý árbir marafonshynyń basty armany. Sebebi, bul halyqaralyq marafondardyń ishindegi eń bedeldisi. Oǵan álemniń túkpir-túkpirinen shamamen 50-52 myń adam qatysady. Men osydan 2 jyl buryn Amsterdamda júgirý marafonynan biliktilikti rastaıtyn normatıvti tapsyrdym, normatıv nátıjesi belgili bolǵannan keıin Nıý-Iorktegi júgirý marafonyn uıymdastyrýshylary meni qatysýǵa shaqyrdy. Bul marafon byltyr ótýi kerek edi, biraq pandemııaǵa baılanysty keıinge shegerildi. Jalpy atalǵan júgirý saıysy jyl saıyn qarasha aıynyń alǵashqy demalysynda ótedi. Shynymdy aıtsam, osyǵan deıin túrli deńgeıdegi 22 halyqaralyq júgirý marafonyna qatyssam da, mundaı dárejeli marafondy áli kórgen emespin», dep áserimen bólisti Saltanat Túıtebaev.
Júgirý saıysynyń nátıjeleri áli belgisiz.
«Marafon jas ereksheligine qaraı topqa bólinip ótti. Meniń jasym 76-da, men 75 pen 79 jas aralyǵyndaǵy marafonshylar sanaty boıynsha qatystym. Júgirýdiń ózi ońaıǵa soqqan joq, óıtkeni bul marafonnyń jóni men talaby múldem basqa. Degenmen, qatysyp kórgenime qýanyshtymyn, al nátıjesin kóre jatarmyz. Taǵy bir qýantarlyq jaǵdaı, osyndaǵy qazaq baýyrlarymyz meniń qatysatynymdy bilip maǵan úlken qoldaý kórsetti. О́zimizdiń qazaqtyń balalary marafon bitken soń meni kútip alyp, gúl shoǵyn syılap, jyly lebizderin bildirdi», deıdi jelaıaq qarııa.
