«Jantórındikter» tórt kún boıy Jastar teatry tórinde repertýaryndaǵy eń úzdik degen tańdaýly qoıylymdaryn bas shahar kórermenderi nazaryna usyndy. Atap aıtsaq, óner saparynyń shymyldyǵy belgili aqyn, «Qurmet» ordeniniń kavaleri, «Eren eńbegi úshin» medaliniń ıegeri Svetqalı Nurjannyń «Han kegi» poetıkalyq dramasymen (rejısseri G.Merǵalıeva) ashylsa, 10 qarasha kúni ıakýt rejısseri Sergeı Potapovtyń Garsıa Lorka dramatýrgııasy negizinde sahnalanǵan «Bernarda Albanyń úıi» dramasy qoıyldy. Al 11 qarashada orys tilinde qoıylǵan rejısser Gúlsına Merǵalıevanyń «Dıkıe ıstorıı 16+» spektakli (avtory Don Nıgro), 12 qarasha kúni kıno jáne teatr akteri, dramatýrg Nartaı Saýdanbekulynyń «Álıhannyń amanaty» (rejısseri G.Merǵalıeva) rekvıem-dramasy kórsetildi.
Nurmuhan Jantórın atyndaǵy Mańǵystaý oblystyq mýzykalyq drama teatry Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń bastamasymen 2003 jyldyń 21 naýryzy kúni ashyldy. Eń alǵash teatrdyń úlken zalynda kórermen nazaryna Ǵ.Músirepovtiń «Qyz Jibek» spektakli, ekinshi zalynda T.Álipbaevtyń «Tomırıs» dramasy usynylyp, qos qoıylym da jurtshylyq tarapynan joǵary baǵalandy. 2006 jyly Mańǵystaý oblystyq mýzykalyq drama teatryna Qazaqstannyń halyq ártisi, Memlekettik syılyqtyń laýreaty Nurmuhan Jantórınniń esimi berildi.
Osy jyldar ishinde irgeli óner ujymy ártúrli janr, alýan taqyryptaǵy spektaklderdi sahnalap, kórermenge usynyp keledi. Teatr repertýaryndaǵy álem sahnalarynan máńgilik oryn alǵan Ý.Shekspır, J.Moler, F.Erve, A.Chehov, N.Gogol, Sh.Aıtmatov syndy klassıktermen qatar, qazaq dramatýrgııasynyń negizin qalaǵan M.Áýezov, Ǵ.Músirepov, dramatýrgııa salasynda súbeli sahnalyq týyndylar qaldyrǵan Á.Kekilbaıuly, D.Isabekov, S.Balǵabaev, E.Raýshanov, kórshiles elder dramatýrgterinen S.Ahmad, M.Baıdjıev, G.Hýgaev, Z.Zaınýllın, sondaı-aq Mańǵystaý óńirinen shyqqan aqyn, jazýshylar – S.Nazarbekuly, S.Adaı, S.Nurjan, S.Qudaıbergenov sekildi basqa da avtorlardyń týyndylary bar.
Qurylǵannan bergi 19 jyl ishinde kóptegen iri halyqaralyq deńgeıdegi festıvaldardan oljaly oralyp kelgen jas teatr árdaıym qoǵamdaǵy saıası-mádenı ózgeristerge beıtarap qaramaı, únemi óz únin qosyp kele jatyr. Búginde teatrdyń repertýar qorjynynda 90-ǵa tarta úlkenderge arnalǵan, 20-ǵa jýyq balalarǵa arnalǵan qoıylym bar. Sonyń bir parasyn elorda turǵyndary men qonaqtary nazaryna usynǵan izdengish ujym ózderiniń qaı kezde de shyǵarmashylyq babynda ekendikterin taǵy bir márte dáleldeı tústi. Kórermenniń rýhanı-estetıkalyq talǵam-kózqarasynyń qalyptasýyna aıryqsha úles qosyp júrgen óner ordasynyń bul sapary bas shahar halqyna shyn máninde tamasha tartý boldy.
