Fýtbol • 16 Qarasha, 2021

Qazaqstan Fýtbol federasııasy memleket qarjylandyrýynan bas tartty

770 ret

kórsetildi

3 mın

oqý úshin

Qazaqstan fýtbol federasııasynyń (QFF) bas hatshysy Azamat Aıthojın 2022 jylǵy álem chempıonatynda ulttyq quramanyń Fransııadan jeńilgenine qatysty pikir bildirdi. Ol federasııaǵa memlekettik bıýdjetten bólingen aqsha týraly, qurama úshin fýtbolshylar rezerviniń joqtyǵy jáne memlekettik qarjylandyrýdan bas tartý týraly sheshim qabyldaǵanyn aıtty, dep habarlaıdy Egemen.kz.

Gaýhar QAPASh

Qazaqstan Fýtbol federasııasy memleket qarjylandyrýynan bas tartty

Azamat Aıthojın tarıhtaǵy eń iri jeńilisine sebep dep kóptegen negizgi oıynshylardyń azaıǵanyn jáne jalpy ulttyq komanda rezerviniń bolmaýyn aıtty.

«Búgingi tańda bizde ulttyq quramanyń rezervi joq dep aıtýǵa bolady. Komanda jetekshilerin almastyrǵan oıynshylar áli halyqaralyq deńgeıde oınaýǵa daıyn emes», dedi Aıthojın.

Sondaı-aq, ol federasııaǵa memlekettik bıýdjetten bólingen somalar jarııa etilgen somaǵa qaraǵanda áldeqaıda az ekenin atap ótti.

«Jurtshylyqtyń synyna keletin bolsaq, ashyq aıtaıyn: ótken jyldary Qazaqstan fýtbol federasııasy memlekettik bıýdjetten 200 mıllıon teńgeden aldy, olar túrli quramalar úshin halyqaralyq jarystarǵa: jasóspirimder (U17, U19), jastar U21, Blind-Football (zaǵıp jandarǵa arnalǵan fýtbol), áıelder, ulttyq, jaǵajaı, sondaı-aq fýtzal quramalaryna daıyndyqty jáne uıymdastyrýdy kózdedi. Mıllıard týraly áńgime qaıdan shyqty?

Kelesi jyldan bastap Qazaqstan Fýtbol federasııasy memlekettik jáne kvazımemlekettik qurylymdar esebinen qarjylandyrýdan bas tartý týraly sheshim qabyldady. Uıym ÝEFA qarajatynyń túsýi, sondaı-aq demeýshilik aqshany tartý esebinen qarjylandyrylady.

Sondyqtan, ulttyq quramanyń sátsizdikterinen keıin ózin jarnamalaǵysy keletin synshylar men popýlısterge aıtaıyn: sizder, eń bolmaǵanda, máseleniń mánin túsinýge tyrysyńyzdar, oıǵa kelgendi aıta berýdiń aldynda materıaldyq bóligin oqyp shyǵyńyzdar.

Fýtbol árqashan bizdiń elde bolǵan jáne solaı bolyp qalady. Bul, sózsiz, mıllıondaǵan adam unatatyn sport túri. Árıne, ony jańa deńgeıge kóterý úshin jyldar qajet jáne barlyǵynyń qoldaýy qajet. Komanda jeńiske jetse, sizder keshe osy jigitterge aıtqan syndy umytyp, olardy árdaıym qoldadyq deısizder. Sondyqtan komandanyń basynan árdaıym jeńilis te, jeńis te qatar ótedi.

Sondaı-aq, jaqyn arada ulttyq quramanyń bas jattyqtyrýshysymen birge jurtshylyqty tolǵandyratyn suraqtarǵa jaýap berý úshin jetekshi sport jýrnalısterimen kezdesý ótkizemiz», dep keltiredi QFF saıty Aıthojınniń sózin.

Eske salaıyq, Qazaqstan quramasy 2022 jylǵy álem chempıonatynda irikteý kezeńin D tobynyń sońǵy ornynda aıaqtady. Quramamyz Fransııadan oısyraı utylǵan edi. Bul Qazaqstannyń resmı oıyndardaǵy eń iri jeńilisi bolyp tirkeldi. Fransııa quramasy qazaqstandyq fýtbolshylardy 8:0 esebimen jeńdi. Matchte Kılıan Mbappe Fransııa sapyndaǵy alǵashqy pokerin jasady. Odan bólek, Karım Benzema eki gol soqsa, Grızmann men Rabo da bir-bir golmen esepti eseledi.