Qapshaǵaıda kún elektr stansasy bar

О́rkenıetke umtylǵan elimizde tabys kóziniń taǵy biri kún nurynan elektr qýatyn alý bolyp otyr. Tabıǵat-ananyń osynaý teńdessiz tartýy Almaty oblysynyń Qapshaǵaı qalasynda paıdalanylýda. Eldiń turaqty damýyn qamtamasyz etetin tetiktiń biri jasyl ekonomıka ekendigi bıik minbelerde aıtylyp, jalpy tabıǵat janashyrlary ortasynda da dáleldenýde. Mine, sol jasyl ekonomıkaǵa kóshý Qazaqstandy álemdegi damyǵan 30 órkenıetti memleket qatarynan oryn alýyna múmkindik týdyratyny aqıqat. Elbasynyń jasyl ekonomıkaǵa kóshý týraly Jarlyǵyna sáıkes «Samuryq-Energo» aksıonerlik qoǵamy kún kózinen kúsh alatyn qýattylyǵy 2 megovatt elektr stansasynyń qurylysyn Qapshaǵaı qalasynda aıaqtady. Jobanyń basty maqsaty – kún nurynyń áleýetin tolyǵymen paıdalanyp, óńirde elektr energııasyn óndirýde atmosferalyq aýa qabatyna shyǵarylatyn zııandy gaz mólsherin azaıtyp, elektr energııasyna degen qajettilikti tolyǵymen qamtamasyz etý bolyp tabylady. Bul jobany júzege asyrý barysynda Eýropanyń ozyq tehnologııasy paıdalanyldy. Quraldardyń 70 paıyzy kún nurynan boıyna sáýle tartyp, ustap tursa, talapqa saı qondyrǵylardyń ózge 30 paıyzy kún nuryn úzilissiz óndirip paıdalanýǵa daıyndaıdy. Kún elektr stansasy barlyǵy 6 gektar jerdi alyp jatyr. Onda 8 myń kún monokrıstaldy panelderi qoıylǵan. Sonyń ishinde 2,5 myńǵa jýyǵy trekerlik qondyrǵyǵa ornatylǵan. Stansada qondyrǵy quraldardy paıdalaný jóninde arnaıy oqyp, kásibı biliktiligin kóterip kelgen joǵary sanatty 5 maman jumys isteıdi. Qapshaǵaıdaǵy kún elektr stansasy jylyna 3 mln. 600 myń kılovatt saǵat elektr energııasyn óndiredi. Qýattylyǵy 2 megovatt. Búgingi tańda Qapshaǵaı qalasynda salynǵan kún elektr stansasy Qazaqstanda kún masshtabyndaǵy eń birinshi kún elektr stansasy bolyp sanalady. Jobaǵa tapsyrys berýshi «Samuryq-Energo» AQ. Joba quny – 1 700,1 mln. teńge. Joba 2011-2013 jyldary júzege asyryldy. 7995 kún paneli ornatyldy. Osy stansa qondyrǵylaryn ornalastyrý kezinde 100 adam jumysqa tartylǵan edi, búginde daıyn qondyrǵylardy 11 adam basqaryp, óndiris ornyn toqtaýsyz jumys istetip tur. Sóıtip, óńir ekonomıkasyn damytqan ústine damyta túsý barysynda birlese jumys atqarylýda. Nurbol ÁLDIBAEV, «Egemen Qazaqstan». Almaty oblysy, Qapshaǵaı qalasy.