– О́tken ǵasyrlarda at ústinen túspeı azattyq ańsap ótken ata-babalarymyzdyń arman-ańsary biz ómir súrgen ǵasyrda, biz jazyp jatqan tarıhtyń paraqtarynda bederlenip, altyn araı shapaǵyn shashty. Bul – ólsheýsiz baqyt. El basyndaǵy aýyr daǵdarysqa qaramastan jańa memlekettiń irgesin qalaýǵa qulshyna kirisken Elbasy bastamasy qoǵamnan kedergisiz qoldaý taýyp otyrdy. Keshe ǵana bir tý, bir urannyń astynda uıysyp otyrǵan odaqtas respýblıkalar jeke memleket bolyp bólinip shyǵyp, enshisin alǵannan keıin derbes tirlikti neden bastaryn bilmeı daǵdaryp otyrǵanda, kóshbasshymyz Nursultan Ábishuly irkilmesten iri sharýalardy sheshýdi qolǵa aldy. Ol kisiniń el basshysy retindegi eń úlken atqarǵan isi dep óz basym shekarany shegendegenin aıtar edim. Táýelsizdigimiz úshin ana tiliniń orny qandaı bolsa, ultaraqtaı jerin kóziniń qarashyǵyndaı saqtaǵan biz úshin shekara da sondaı qasterli. Til men jer ózimizdiki bolmaı, ózgeniń aldynda «azatpyn, erkinmin, elmin» dep aıta almaımyz. Shekara – óte názik másele, ár ult úshin kıeli sanalatyn jer máselesi durys sheshilmegennen keıin zardabyn urpaǵy tartady. Oǵan mynaý Armenııa men Ázerbaıjan, Reseı men Ýkraına elderi arasyndaǵy jer daýy mysal. Qudaıǵa myń táýbe, qazaq eli osyndaı qantógis pen qyrǵı qabaq soǵystan aman otyr. Al bul tikeleı Elbasymyzdyń eńbeginiń jemisi.
Mine, bostandyqqa qolymyz jetip egemendik alǵanymyzǵa otyz jyl boldy. Tuńǵysh Prezıdentimizdiń taǵdyryna eń qıyn kezeń týra keldi. Keshe ǵana sartyldap jumys istep turǵan zaýyt-fabrıkanyń ókpesin úrlep turǵan otteginiń kózin Reseı, Ýkraına, Belarýs sııaqty jetekshi memleketter jaýyp tastaǵan soń, onsyz da jartylaı shıkizat óndiretin elimiz qol-aıaǵy shiderlenip, birjola turalap qaldy. Prezıdentimiz qalyń tuman arasynan qarmanyp jol taýyp, qıynnyń ózin qıystyryp, adam aıtsa senbeıtin jetistikterge jeteledi. Áli esimde, alǵash «astana Aqmolaǵa aýysady» degen habardy estigende, qımas kóńilmen kózimniń jasyn tyıa almaı jylaǵanym esimde. Al qazir strategııalyq jaǵynan durys qabyldanǵan sheshim ekenin ýaqyt ózi dáleldep otyr. Qazaqstannyń qaq júreginde ornalasqan Nur-Sultan qalasy qazaq eliniń tórt buryshy kelip túıisetin, búkil oblys ortalyqtarymen, shartaraptaǵy shet memlekettermen qarym-qatynas jasaýǵa qolaıly, ekonomıkalyq turǵydan, ekologııalyq jaǵynan tıimdiligin tanytyp otyrǵan iri ortalyqqa aınaldy.
– Siz Táýelsizdik alǵannan keıin bes kúnnen soń, 1991 jyldyń 21 jeltoqsanynda Sosıalıstik Eńbek Eri atanypsyz. Kúırep, kelmeske ketip bara jatqan Keńes Odaǵynyń eń joǵarǵy marapatynyń sońǵy ıegeri siz ekensiz. Qalaı alǵanyńyz esińizde me?
–Ol tarıh kúni búgingideı esimde. Men úshin kútpegen jaǵdaı edi. Keńes Odaǵy qulap jatqanda, sońǵy ret tuıaq serpigendeı, shamasy, otar respýblıkalardy jarylqap, syı jasaǵan M.Gorbachev sypyra jasaýdy jón kórip, shyn júregimen osy buıryqqa qol qoıǵan eken. Meniń ónerimdi qashan da bıik baǵalaıtyn jáne osy joǵary nagradaǵa laıyq sanaǵan N.Nazarbaev Keńestiń bıik marapatyn óz qolymen tabystady. Meniń de qýanyshymda shek bolmady. Eńbek pen qarapaıym jumysshynyń mańdaı terin erekshe qurmettep, nasıhattaǵan Odaqtyń ıdeologııasy súıegimizge deıin sińip ketkeni sonsha, muny men nagrada degennen góri halyqtyń maǵan degen qurmeti men yqylasynyń jemisi dep qabyldadym. Men árbir marapatyma mańdaı terimmen qol jetkizdim dep maqtanyshpen aıta alamyn. Jarty álemdi, tutas Keńes Odaǵyn, búkil Qazaq dalasyn ońynan da, solynan da kóktep, alystaǵy aýdan, qııandaǵy aýyl demeı, egin dalasynda, bel jazbaı jer tyrmalaıtyn kúnqaqty jandardyń aldynda, zaýyttar men fabrıkalarda, shahtanyń astynda, tipti 7-8 malshynyń aldynda talaı ret konsert berip, án saldym. «Maǵan saltanatty saraı, úlken sahna kerek» dep tákapparlyq tanytpadym, sahna talǵamadym. Bul marapattar – sol eńbektiń nátıjesi.
– Táýelsizdiktiń jeke basyńyzǵa áserin qalaı sezindińiz?
– Táýelsizdiktiń qadirin qıyndyqty kórgen bizdiń urpaq, meniń zamandastarym bárinen góri bıikteý sezinedi. Sebebi keńestik júıeniń ozbyr saıasatynyń salqyny bizdiń otbasymyzǵa ońaı tıgen joq. Ákemizdi «halyq jaýy» atandyrdy, bizdi balalyq shaǵymyzdan aıyrdy, buǵanamyz bekimeı turyp aýyr jumystarǵa jegildik. Bul náýbet aıaqtalmaı jatyp soǵys bastaldy. Atalarymyz ben ákelerimizdi maıdannyń alǵy shebine salyp, ot pen oqtyń aýzyna baılady. Jeti jasymnan jetim qalyp, konservi zaýytynda jumys istep júrgen jerimnen Semeıge jer aýdarylǵan Galına Serebrıakovanyń keńesimen Almatyǵa kelip, konservatorııaǵa oqýǵa túsip, bilim aldym. Jetimdikti de, joqshylyqty da, ádiletsizdikti de kórdik, biraq, adam balasy bárine tózedi eken. Eńbek etseń, túbiniń qaıyry bar. Qazir osynyń bári kórgen tústeı, ózge túgili óz balańa aıtsań da, ertegi sııaqty estiledi. Búgin, mine, qadirli áje bolyp, jastarǵa bata berip, aqyl-keńes aıtamyz. Bul syı-qurmettiń bári maǵan tegin kelgen joq. Jaqsy kórgen adamyna jarty álemdi syılap jibergisi kelip turatyn jany jomart, júregi taza aýyl adamdary, eginshiler men malshylardyń arqasynda Bıbigúl atandym, el erkesi boldym, dańqqa bólendim. Meni aldymen el tóbesine kótergennen keıin ǵana Úkimet maǵan nazaryn salyp, ataq-laýazymyn birtindep bere bastady. Kúsh – kópte. Muny men eshýaqytta umytpaımyn.
– 1967 jyly keńestik delegasııa quramynda Monrealda ótken EKSPO-ǵa Qazaqstan óner sheberleri de qatysyp, án salyp, konsert bergen ekensizder. Kanada kórmesine kelgen qonaqtar sizderdi qalaı qarsy aldy?
–1967 jylǵa deıin «halyq jaýynyń qyzy» dep, saıası jaǵynan senimsiz adam sanaǵany bolar, meni shetelge shyǵarǵan joq. Irgedegi Qytaıǵa, Polshaǵa, Vetnam sııaqty elderge baramyn, biraq iri kapıtalıstik memleketterge jol jabyq boldy. Batys Eýropaǵa jol osy Monreal saparymen ashyldy. Jaı sapar emes, tórtkúl dúnıeniń tehnıkalyq jetistigin taýar sııaqty tizip tastaǵan EKSPO-nyń ózine bardyq. Delegasııa quramynda Báıken Áshimov, Sattar Imashev, Ilııas Omarov sekildi belgili memleket qaıratkerleri, Ermek Serkebaev, Roza Jamanova, Rıshat Abdýllın, Roza Baǵlanova, Bolat Aıýhanov, Baıǵalı Dosymjanov sııaqty óner qaıratkerleri boldy. Biz Roza Jamanova ekeýmiz qonaqúıdiń bir bólmesinde turdyq. Bizdi Monrealdiń modern stılindegi arhıtektýrasy, shyny ǵımarattar, tipti bólmemizdegi qabyrǵaǵa japsarlas jasalǵan shkaf ta tańǵaldyrdy. Áli esimde, Qazaq KSR-nen kelgen óner sheberleriniń gala-konserti sumdyq anshlagpen ótti. Bizdi jan-jaǵymyzdan týrıster kelip qorshap: «Qytaısyńdar ma, álde japonsyńdar ma?» dep qyzyqtap suraıdy. «Qazaqpyz» deımiz. Kórmegen, estimegen, bilmeıdi. Qalaı aıtsań da, túsinbeıdi. Bizdiń konsertimizge ashtyq jyldarynda elden jyraqtap ketken otandastarymyz da keldi. Qyzyn jetektep kelgen bir salıqaly qazaq bizdiń janymyzǵa kelip eńkildep turyp jylady. Qorqyp qaldyq. Túrkııadan osy EKSPO-ny arnaıy kórýge kelgen matematıka ǵylymynyń professory eken. Elge degen saǵynyshyn aıtyp jetkize almaı eńiregeni kópke deıin esimnen ketpeı júrdi. Al osyndaı eshkim estimegen, bilmegen, bilgeni orystyń basybaıly bir bodany dep qana qaraǵan Qazaqstanymyzdy kúlli álemge Nursultan Ábishuly tanytty. Bul shyndyqpen eshkim de daýlasa almaıdy. Táýelsiz eldiń Prezıdenti bolyp saılanǵan kúnnen bastap jarǵaq qulaǵy jastyqqa tımeı, shartaraptaǵy elderdi sharlap, Qazaqstannyń saıası qarym-qatynasyn rettegen abyroıly muraty kóz aldymyzda júzege asty. «Elý jylda – el jańa» degen, osy maqaldyń mazmunyn kesh te bolsa, shyn uqtym. Kanada elindegi aýzymyzdy ashtyryp, kózimizdi jumǵyzǵan ertegideı «EKSPO – 67» tup-týra elý jyl ótken soń, 2017 jyly bizdiń elimizde, óz Otanymyzdyń tórinde ótedi dep oıladyq pa? Qol jetpes armandy shyndyqqa aınaldyrǵan adam Nursultan Ábishuly ǵoı, qane, bul shyndyqpen kim talasa alady? Asúıde otyryp áńgime aıtqan jeńil, al bir memlekettiń tizginin ustap, kóshin alyp júrýdiń qıyndyǵyn Elbasy ózi ǵana biledi. Sebebi ıyǵyna aýyr júkti artqan da ózi, salmaǵyn sezingen de ózi. Qazir zaman keń ǵoı, qaıda baryp oqımyn deseń de, qaı elde demalamyn deseń de, tipti qaı jaqqa kóship ketemin deseń de, aldyńda jol saırap jatyr. Basta bilim, boıda batyldyq, qaltada aqsha bolsa, esh kedergi joq. Bul – qazir, al osydan otyz jyl buryn osynyń biri de múmkin be edi? Oılanǵanymyz abzal.
– Toqsan jasqa tolǵanyńyzda Elbasy sizdi qabyldady. Siz Nursultan Ábishulyn erterekten tanıtyn bolarsyz?
– Men Nurekeńdi tanyǵaly jetpis jylǵa jýyqtady-aý, shamasy. Ol kezde Qazaqstannyń halyq ártisi ataǵyn jańa ıelengenmin. Ýkraınanyń Dneprodzerjınsk qalasyna gastroldik saparmen barǵanymda metallýrg mamandyǵynda oqyp júrgen bir top qazaq balasy konsertime kelip qatysty. Sol konsertte Nurekeń maǵan gúl syılady. «Apaı, biz osynda bir top qazaq balasy oqyp júrgen edik. Bitirgen soń elge baryp jumys isteımiz» dedi. Sodan keıin ol kisini Temirtaýdyń metallýrgııa zaýytynda, komsomol oryndarynda, partııa komıtetinde qyzmet istep júrgen kezinde kezdestirdim. Temirtaýǵa gastroldik saparmen barǵan kezimde bir jigitter kelip: «búgin sizdiń konsertińizge birinshi hatshymyz kelip qatysady» dedi. Keshke Nursultan Ábishuly men Sara Alpysqyzy ekeýi kelip ónerimdi tamashalady. «Nurekeńmen birge jıi shaı ishetin edik» dep maqtana almaımyn. Biraq sırek te bolsa saltanatty jıyndarda, merekelik basqosýlar men túrli sharalarda kózi shalyp qalsa, kelip amandasyp, qolymyzdy alady. Kóńil shyraıyn kórsetip, kishipeıildik tanytyp, nıettestigin bildiredi, biz de árqashan ol kisiniń ár isin qoldap, syrttaı tilekshi bolyp otyramyz. Elbasy 2019 jyly 90 jyldyq mereıtoıyma oraı meni qabyldap, iltıpat tanytyp, qurmetin kórsetti. Ol úshin tek rahmetimdi ǵana aıtamyn.
– Siz Sháken Aımanovtyń fılmderine tústińiz. «Bizdiń súıikti dáriger» fılmindegi tańǵy shyqtaı tamyljyǵan «Kóktem valsi» men «Taqııaly perishtedegi» «Ana» áni qazaq estradasynyń eskirmeıtin hıt áni bolyp tyńdarman qaýymnyń qulaǵynda máńgi qaldy. Biraq osy fılmge Taılaqtyń ápkesi bolyp siz túsesiz de, ándi belgili ártisimiz Baqyt Áshimova oryndaıdy. Nege?
– Búgingi kórermen bile bermeıtin bir jaıt bar. Sol kezdiń fılmderinde bir shýmaq bolsa da án aıtylýy tıis deıtin jazylmaǵan qaǵıda tán edi. Áıel daýysymen shyrqalatyn ánge Sháken aǵa mindetti túrde meni shaqyratyn. «Dala qyzy» fılmine de solaı túskenmin. Al «Bizdiń súıikti dáriger» fılmine shaqyrǵanda, Sháken aǵa: «Bıbigúl, bul fılmde sen ózińdi oınaısyń. Barlyq ártisterdi shaqyryp otyrmyn, solardyń árqaısysy óz rólin oınaıdy» dedi. Shynymdy aıtsam, óz kóńilime jaqqany da osy fılm boldy. Biraq óner kútpegen, tosyn jaıttarǵa toly bolady eken. «Taqııaly perishte» fılminde men epızodtyq rólde oınaımyn. Án aıtyp, bir-eki kadrda tóbe kórsetkenim bolmasa, jaýapkershiligi bar salmaqty ról emes-tin. Biraq «Bizdiń súıikti dárigerdegi» jalt-jult jasanǵan rólim «Taqııaly perishtedegi» Tana sheshemniń bir-eki tusta bolar-bolmas jylt etken qyzynyń róline astar bolýǵa jaramaı qaldy. Qyzyq boldy. Osy fılm jaryqqa shyqqannan keıin qaı aýylǵa barsam da, qaı qalada konsert bersem de, kórermenim «Mamany aıt» dep maǵan qolqa salyp, qol soǵyp otyryp alatyn boldy. «Fılmge túskenmen, ol ándi men oryndaǵan joqpyn. Ándi Baqyt Áshimova aıtady» desem de, «Qalaısha aıtpaısyń? Fılmnen seni kórgenimiz ras qoı, endeshe ándi de sen aıtasyń» dep jurt jer tepkilep otyryp alatyn. Aqyry ándi jattap, áýezin kóterip, ózimniń lırıkalyq soprano daýysyma laıyqtap aıtýyma týra keldi.
– Aıtpaqshy, sizdi Rústem Ábdirashevtyń «Balalyq shaǵymnyń aspany» fılminde Elbasynyń ájesiniń rólinen de kórgen edik. Baǵalaǵan adam úshin bul keıipkerińiz de biregeı beıne bolyp shyqqan. Sháken aǵamyz beker qolqa salmaǵan, ánshi bolmaǵanda, aktrısa bolatyndaı qabiletińiz bar, kıno óneriniń ıirimine túspegenińiz tańǵaldyrady...
– Birde Rústem telefon soǵyp: «sizdi bir qart ájeniń róline shaqyrsaq, qalaı qaraısyz?» dep ótinishin aıtty. «Kásibı aktrısalar turǵanda, qandaı ájeniń róli ol?» dep qansha qarsylassam da, Rústem aqyry kınosyna qatysýǵa kóndirdi. «Belgili aktrısalardyń ózi at-tonyn alyp qashyp oınaýdan bas tartyp júrgen qandaı áje ol ózi?» dep aqyry shaqyrǵan stýdııasyna keldim. Betimdi árlep, kımeshek kıgizip, aldyma qol dıirmenin qoıyp, qasyma bir balany júgirtip qoıdy. Sóıtip otyrǵanda qolyma bir paraq qaǵaz berip, «myna mátindi oqyp kórińiz» dedi. Oqysam, Nursultan Ábishulynyń ájesiniń sózi. Shyn júreksindim. «Qoı, aınalaıyn» dep men de atyp turyp, álgi aktrısalar sııaqty ketýge yńǵaılandym. Rústem tabandy jigit eken, «munyń áli fılm emes, jaı ǵana synaq» ekenin aıtyp, róldi aıaǵyna deıin oınatty. Sózdiń qysqasy, kórkemdik keńes meni bekitipti. Fılm Jambyl aýdanynda, Uzynaǵash aýylynda túsirildi. Sondaǵy aýyl adamdarynan, aǵaıyndarynan keıipkerim týraly málimet jınap, «qandaı adam edi?» dep surastyryp, ózimshe zertteý júrgizdim. Sóıtsem, Nurekeńniń ájesi uzyn boıly, minezi susty, eshkimniń bet-júzine qaramaıtyn óte ótkir adam bolǵan eken. Aýyldastary kózine týra qaraı almaı taısaqtap, júzin tómen salatyn kórinedi. «Meniń boıym tapal ǵoı» dep taǵy da shegingim kelip edi, birneshe qabat kórpesheniń ústine qoqıtyp otyrǵyzyp, rejısser ol máseleni de sheship qoıdy. Rejısser «sustylaý qarańyz», «qattyraq aıtyńyz» degen sózin qaıtalaı beredi. «Aınalaıyn, bireýge tilim tıip, balaǵattamasam, budan artyq qatty sóıleı almaımyn» deımin. Ájimdi tereń salyp, tyrnaǵymnyń astyna qara boıaý jaqty. Sóıtip seksennen asqan shaǵymda aktrısa boldym. Fılm kórermenge jol tartty. «Balalyq shaǵymnyń aspanyn» kórgen Nurekeń: «Bıbigúl apamnyń ájesi óte kreatıvnyı bolyp shyǵypty. Búkil qazaqtyń ájesi sııaqty áser beredi» degen eken. Fılmdi kórgennen keıin keı adam: «Al Bıbigúl Tólegenova qaıda?» dep suraıtyn kórinedi. Tıtrde aty bar, ózi joq. Bul qalaı? «Fılm Bıbigúl Tólegenovanyń dıirmenmen un tartyp otyrǵanynan bastalmaı ma?» degende ǵana «adamdy da osynshama ózgertýge bolady eken-aý» dep tańyrqaǵandar kóp boldy. Al Darıǵa Nursultanqyzy ekrannan úlken ájesin kórip aǵyl-tegil jylapty. «Meniń ájem de osyndaı ójet bolǵan edi, sonda ájem óz enesine uqsaǵan eken ǵoı» dep óz ájesin eske alyp, kóziniń jasyn bir bulap alypty.
– Bıbigúl Tólegenova atyndaǵy halyqaralyq vokalıster konkýrsy – naǵyz Táýelsizdiktiń tól týyndysy. Jas oryndaýshylar baǵyn synaıtyn bul baıqaýdyń arqalaǵan muraty, uıymdastyrylý sebebi belgili. Pandemııaǵa qaramastan kúni keshe HI konkýrsty ótkizip, tynystap otyrsyz. Án ónerindegi bul salmaqty baıqaý jas talanttarǵa ataqtan basqa ne beredi?
– El esinde bolar, meniń Márııamgúl degen qyzym boldy. О́kinishke qaraı, 2007 jyly mezgilsiz dúnıeden ótti. Sol jyldary Máskeýde Irına Arhıpova, Elena Obrazsova syndy Reseıdiń opera juldyzdary ózderiniń atyna konkýrs jarııalap, túkpir-túkpirdegi talanttardy shaqyryp, baǵyn synatyp, olarǵa jol ashyp jatty. Qyzym: «Mama, búkil respýblıkalardaǵy myqty ánshiler baıqaý ótkizip jatyr. Qazaqstannyń atynan siz de uıymdastyrsańyz qalaı bolady?» dedi. Men ádettegideı basymdy alyp qashyp, birden qarsylyq tanyttym. Márııam aqyry meni kóndirip, konkýrs uıymdastyrýdy óz moınyna aldy. Úsh-tórt jyl qatarynan Máskeýdi, basqa da shet memleketterdi aralap, arhıvterin aqtaryp, qujattarymen tanysyp, halyqaralyq baıqaý ótkizýdiń tájirıbesin zerttedi. «Sabaqty ıne sátimen» degen, ǵaryshtaǵy Talǵat Musabaev pen jerdegi Nurlan О́nerbaevtyń «Kózimniń qarasyn» qosyla shyrqaǵan dýetin tikeleı baılanystan tamashalaý úshin Nursultan Ábishuly stýdııaǵa shaqyrylǵan eken. Nurlan bizdi de shaqyrǵan. Jınalǵan otyz shaqty adamnyń arasynda Nurekeń kelip amandyq surady. Baıqaý uıymdastyrǵaly jatqanymdy aıttym. Sol-aq eken, janymdaǵy Márııamgúl Elbasyǵa konkýrsty jekemenshik etip ótkizýge týra kelip turǵanyn, ol úshin demeýshiler izdep jatqanyn aıtty. «Demeýshi izdeýdiń ne keregi bar, jekemenshik baıqaý jasaýdyń qajeti qansha? Bıbigúl Tólegenova qazaqta bireý ǵana, sondyqtan ol baıqaý memlekettik bolýy tıis», dedi Nurekeń. Qyzymnyń janary ottaı janyp, qanattanyp ketti. Prezıdent qoldaǵannan keıin biz 2001 jyly Úkimet basshysy Qasym-Jomart Toqaevqa hat jazdyq. Ol kisi qol qoıdy. Memleket basshylarynyń tikeleı qoldaýymen dúnıege kelgen halyqaralyq konkýrs, mine, jıyrma jyldan beri dástúrli túrde ótip keledi. Bári jaqsy. Biraq úlken bastamany kóterip, basy-qasynda júrip, barlyq aýyr jumysyn atqarǵan Márııamgúlimniń joqtyǵy ǵana áli kúnge ózegimdi órteıdi. Al qazir Márııamgúldiń jarııalaǵan baıqaýyn orta jolda qaldyrmaı, atyn óshirmeı, rýhy shat bolsyn degen tilekpen bul aýqymdy jobany ekinshi qyzym Gýzel qolyna alyp, jalǵastyryp jatyr. H halyqaralyq baıqaýdyń bas júldesin Italııanyń jas ánshisi Kozımo Oreste jeńip aldy. Ol qazir La-Skalada jáne Vena Opera teatrynda án shyrqaıdy. Sondyqtan bizdiń baıqaýymyzdyń jaǵrapııasy óte keń ári salmaqty dep maqtanyshpen aıta alamyn. Biz jastarǵa jol ashamyz. Bizdiń konkýrstan qanat qaǵyp ushyp shyqqan jas talanttar álemdik deńgeıdegi basqa da baıqaýlarǵa qatysyp, óz eliniń atyn pash etip, júldeger atanady. Estrada – kezeńdik óner, býyrqanǵan ýaqyttyń synyna tótep bere alatyny neken-saıaq, al klassıka – máńgilik. Adamnyń jan álemine jaryq nur shashyp, baıytatyn rýhanı azyq.
– Búkil álemdegi jeke memleketterdiń ońashalanyp, oqshaý ómir súrip jatqanyna eki jylǵa taıap keledi. Aty jaman indetten qalaı qorǵanasyz, ekpe aldyńyz ba?
– Árıne, «Spýtnık» vaksınasynyń eki komponentin de saldyrdym. Jyldyń sońynda úshinshisin qabyldaýǵa ázir otyrmyn. Bul jaǵynan óte tártipti adammyn. Sebepsiz dalaǵa shyqpaımyn. Kópshilik orynǵa múlde barmaımyn. О́zimdi jýrnalısterge eń ashyq adammyn dep esepteýshi edim. Suhbattan bas tartqan, qoıǵan suraqtyń jaýabynan jaltarǵan jerim joq. Qazir de telearnalarǵa suhbatqa jıi shaqyrady. Bas tartqanym úshin renjıdi. О́zim taý bókterindegi Baǵanashylda turamyn. Aýlam toly qaraǵaı men qaıyń. Bir ýaq taza aýamen tynystaýǵa shyqqanymda, ormandaǵy qaraǵaıdyń ortasynda otyrǵandaı sezinetinim bar. Jasym 92-ge kelse de, qarap otyra almaımyn. Kúlásh Baıseıitovadan bastap Álibek Dinishevke deıingi qazaq ánshileriniń ónerin qamtyǵan «HH ǵasyrdyń juldyzdary» atty antologııany ázirlep, baspadan shyǵardyq. Ermek Serkebaevtyń qyzy Irına Serkebaeva ekeýmiz eki jyl suhbattasyp júrip «Bıbigúl Tólegenova: súıý, úmit pen senim» – «Bıbıgýl Týlegenova: lıýbıt, nadeıatsıa ı verıt» atty oryssha-qazaqsha kitapty oqyrmanǵa syıǵa tarttyq. Tynyshtyqty jaqsy kóremin. Kitap oqımyn. Áıteýir ómirdegi bar jaqsy nárseni, jaryq dúnıeni, sulýlyqty súıemin.
– Áńgimeńizge rahmet.
ALMATY
