«4 jeltoqsan kúni tús qaıta jol qozǵalysy qaýipsizdigin qamtamasyz etý barysynda Qazyǵurt APB patrýldik polısııa qyzmetkerleri kámeletke tolmaǵan bala júrgizip bara jatqan «VAZ-21214» markaly avtokólikti baıqaǵan.
Polıseılerdiń toqtaý týraly pármenine bala baǵybaǵan. Ol baǵdarshamnyń qyzyl túsine qaramaı ótip ketip, qarsy baǵytta kele jatqan kólikterdi basyp ozyp, oqıǵa ornynan boı tasalaýǵa tyrysqan. Polısııa jol erejesin buzýshyǵa kólikti dereý toqtatýdy buıyrdy. Alaıda júrgizýshi polısııa qyzmetkerlerinen qashyp ketip, kólikti joǵary jyldamdyqpen júrgizip kele jatyp, temir qorshaýǵa soǵysyp, saldarynan jol-kólik oqıǵasy oryn aldy», delingen oblystyq polısııa departamentiniń baspasóz qyzmeti taratqan habarlamada.
Jol-kólik oqıǵasy saldarynan kámeletke tolmaǵan jasóspirim Qazyǵurt aýdandyq aýrýhanasyna dene jaraqatymen jetkizildi.
Tekserý barysynda rýlinde bala otyrǵan «VAZ-21214» markaly avtokólik Qazyǵurt aýdanyndaǵy JShS-niń birine tıesili ekeni anyqtaldy. Kólikti jasóspirimniń ákesi jumysynyń mańyndaǵy turaqqa qoıǵan. Biraq balasy kólikti ruqsatsyz urlap ketken.
Búgingi tańda QR QK 200-babynyń 1-bóligi «Avtomobıldi nemese ózge de kólik quraldaryn urlaý maqsatynsyz zańsyz ıelený» boıynsha sotqa deıingi tergeý júrgizilýde. Avtokólik aıyppul turaǵyna jetkizilgen.
