Bizdiń kúsh-qýatymyz berekeli birlikte

Aqparat jáne qoǵamdyq damý mınıstr­liginiń qoldaýymen uıymdastyrylǵan konferensııaǵa qatysýshylar Qazaq­stannyń táýelsizdik jyldaryndaǵy konfessııaaralyq kelisim, óńirlik jáne jahandyq qaýipsizdikti nyǵaıtý, álemdegi dinaralyq dıalogty ilgeriletý salasyndaǵy jetistikterin sóz etti. Basqosý barysynda memlekettiń negizgi basymdyqtarynyń biri retinde jahandyq dinaralyq dıalogty odan ári damytýǵa kúsh salý máseleleri de talqylandy.

Is-sharany ashqan Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵynyń basqarma tóraǵasy Bolat Sársenbaev osy saladaǵy jetistikterge toqtaldy. «Biz Elbasy N.Nazarbaevtyń sarabdal saıasaty men Memleket basshysy Q.To­qaevtyń syndarly strategııalyq baǵy­ty­nyń arqasynda túrli konfessııalar men dinderdiń ókilderi úılesim men ózara syılastyqta ómir súretin biregeı mem­leket qurdyq. Bul sózimizge jıyrma jyl boıy óńirlik jáne jahandyq turaq­tylyqty nyǵaıtýǵa eleýli úles qosyp kele jatqan Álemdik jáne dástúrli din­der kóshbasshylarynyń joǵary rýhanı se­zin ótkizýde Qazaqstannyń tájirıbesi kórneki mysal bola alady», dep atap ótti B.Sársenbaev.

Quttyqtaý sózinde qasterli Táýelsizdik týraly árbir pikirdiń qashanda qundy ári qadirli ekenin aıtqan Aqparat jáne qoǵamdyq damý vıse-mınıstri Serik Egizbaev: «Qazaqstan táýelsizdiginiń tarıhy betterin paraqtar bolsaq, el damýynyń negizgi saıası ustanymy birlik pen tatýlyq ekenin kóremiz. Osy turǵydan alǵanda búgingi ótkizilip otyrǵan is-sharanyń mańyzy zor», dedi.

«Ýaqyttyń uly kóshine ilesip, irgeli el bolý jolynda ata-babalarymyz óziniń tutastyǵyn halyq birligi men berekesin kóziniń qarashyǵyndaı saqtaı bilgen. Ǵa­syr­­lar toǵysyp, zaman almasqan tusta da qazaq halqy alaýyzdyqqa jol ber­meı, qaı ultqa bolsyn qushaǵyn aı­qa­ra ashyp, jomarttyq tanytqan tekti ha­lyq. Qazaq­stan birneshe din ókiliniń eń­bek­súı­gish bolmysyn nasıhattaý arqy­ly barlyǵymyzdyń ortaq aıaýly Otany­myzǵa aınaldy», degen S.Egizbaev bul tur­ǵyda táýelsizdik jyldary el tutas­tyǵyn, be­reke-birligi men tatýlyǵyn alǵa qo­ıyp, el azamattarynyń násilge, dinge ból­meı tekti ómir súrý ustanymyn nyq qa­lyp­tastyrǵan Qazaqstan Respýblıkasynyń Tuń­ǵysh Prezıdenti – Elbasy Nursultan Nazar­baev­tyń orasan eńbegin erekshe atap ótti.

Basqosýda saıası ǵylymdar akademııa­synyń akademıgi, professor Qýanysh Sul­tanov Táýelsizdigimizdiń asyl tuǵyr­larynyń biri – konfessııaaralyq, din­aralyq kelisim ekenin atap ótti. «Kon­fes­sııaaralyq, dinaralyq kelisim – qoǵamdyq keli­simniń eń úlken ári yqpaldy arnasy. Bul uǵym tikeleı adam quqyǵy, zań­dyq keńistikpen de tikeleı baılanys­ty. Bul mańyzdy salalardyń barlyǵy da ortaq múddege jumylady. Ortaq múd­demiz – elimizdiń tynyshtyǵy, beıbit ómir jasam­pazdyǵy, ár adamnyń oqý, eńbekke erkin aralasyp, óz turmysyn, áleýetin jaq­sartyp, qoǵamda ózine laıyq orynǵa ıe bolýy», dedi Q.Sultanov. «Dinniń eń joǵar­ǵy mıssııasy – senim» degen Q.Sultanov dinaralyq kelisimniń, sóz joq, aldaǵy ýaqytta da el yntymaǵynyń basty kepi­liniń biri bolyp qalatynyn aıtty.

Al Parlament Májilisiniń Halyq­aralyq ister, qorǵanys jáne qaýipsizdik komı­tetiniń tóraǵasy Aıgúl Quspan elimiz­diń egemendiginiń alǵashqy sátteri­nen bastap-aq jahandyq dinaralyq dıa­logty damytýǵa kúsh salyp kele jatqa­nyna basymdyq berdi. Depýtat Elba­sy N.Nazarbaevtyń danalyq saıasaty­nyń arqasynda búkil álemge tanymal «Qa­zaqstandyq jol» dep atalatyn memle­ketimizde ultaralyq jáne dinaralyq keli­sim­niń ózindik biregeı modeli qurylǵanyn aıtty. «Qazaqstandaǵy etnostardyń beı­bitshilik pen kelisim keńistiginde ómir súrýi – bizdiń basty baılyǵymyz. Yqy­lym zamannan beri qazaq halqy óziniń jerine kóship kelgen árbir adamdy jan jylýlyǵymen, meıirimdi ala­qa­nymen qarsy alǵany kópke aıan», dedi.

Sózin «Táýelsizdik – Allanyń bergen syıy men nyǵmeti» dep bastaǵan Qazaqstan musylmandar dinı basqarmasynyń tóraǵasy, Bas múftı Naýryzbaı qajy О́tpenov egemendigimizdi baıandy etý árbir azamattyń asyl boryshy ekenine nazar aýdartty. «Qazaqstan musylmandary dinı basqarmasy óziniń ýaǵyz nasıhat jumystarynda jamaǵatty ár kez tek el ıgiligi úshin eńbek etip, táýelsizdigimizdi qadirleýge shaqyryp keledi. Árbir ata-ana óz urpaǵyn táýelsizdikti qasterleýge úıretip, tálim-tárbıe berýde belsendi bolýǵa tıis. Mektep muǵalimderi de oqýshylardy otanshyl bolýǵa baýlyp, bolashaq maman ıelerine izgilik pen adamgershiliktiń negizinde bilim bergeni abzal. Biz barshamyz jastardyń sanasyna «Men elimniń erteńi úshin qandaı úles qosa alamyn?» degen oılardy sińirip, olardyń qoǵam aldyndaǵy jaýapkershiligin barynsha túsindirýimiz qajet», dedi Bas múftı.

Halyqaralyq Túrki akademııasynyń prezıdenti, «Egemen Qazaqstan» respýb­lıkalyq gazeti» AQ basqarma tóraǵasy Darhan Qydyráli alqaly jıynnyń táý eter táýel­sizdigimizdiń ordaly otyz jyldy­ǵy qarsańynda ótýiniń sımvoldyq ma­ńyzyna toqtaldy. Tili bólek bolǵany­men tirligi bir, dini basqa bolǵanymen tilegi bir dinı ókilderdiń el egemendigine qosqan úlesin atap ótken D.Qydyráli el gazetine jarııalanǵan Elbasy Nursultan Nazarbaevtyń «Táýelsizdik taǵylymy» maqalasynda aıtylǵan mańyzdy máse­lelerge taǵy bir sholý jasap ótti.

Konferensııada sóz tizginin alǵan Qaskeleń Epıskopi, Astana epar­hııa­synyń vıkarııi Gennadıı, Nur-Sul­tan qalasyndaǵy Áýlıe Marııa Rım-Kotolık Arhıeparhııasynyń arhıepıs­kopy T.Peta, Halyqaralyq Mádenıet arqyly beıbitshilik» assosıasııasynyń prezıdenti T.Muhamedjanov, Kazakh TV halyqaralyq spýtnıktik telearnasynyń bas dırektory, QHA Tóraǵasynyń orynbasary M.Bekbaeva, Nur-Sultan qala­syndaǵy Bas Ravvın Sh.Karnaýh, Qazaq­standaǵy Ispanııa Koroldigi mıssııasy basshysynyń orynbasary M.Fran Rýıs, Qazaqstandaǵy BUU Turaqty úıles­ti­rýshisi M.Frıberg-Storı, Germa­nııa Federatıvtik Respýblıkasynyń Qazaq­standaǵy elshisi Monıka Iversen, sondaı-aq ǵylymı-sarapshylyq qoǵamdastyq, sheteldik dıplomatııalyq ókildikter, Qazaqstandaǵy halyqaralyq uıymdar ókilderiniń barlyǵy tarıhı qysqa merzim ishinde elimizdiń barlyq salada derlik zor tabysqa qol jetkizgenin atap ótti.

Halyqaralyq sarapshylar Tuńǵysh Prezıdent – Elbasy N.Á.Nazarbaevtyń Táýelsiz Qazaqstannyń qalyptasýy men damýyna, túrli konfessııalar ara­synda beıbitshilik pen kelisimniń tıimdi modelin qurýǵa, biregeı dıalog alańy – Álemdik jáne dástúrli dinder kósh­basshylarynyń sezin uıymdastyrýdaǵy aıryq­sha róli men úles qosýyna erekshe nazar aýdardy. Is-shara sońynda konfe­rensııaǵa qatysýshylar biraýyzdan qazaq­standyqtardy el Táýelsizdiginiń 30 jyl­dyǵymen quttyqtap, odan ári órkendeý, Qazaqstan halqyna beıbitshilik pen kelisim tiledi.