Qalanyń qaýyrt tirliginen qol bosaǵanda aýylǵa qaraı jol salǵyń kelip turady. Dál osy kartınadaǵydaı alańsyz kúnderdiń jańǵyryǵy sanańyzdy bılep alatyny bar. «Aýyldan adam kóshkenmen, adamnan aýyl kóshpeıdi» degendeı osy bir názik oıdan aryla almaısyz. Belgili sýretshi Taıra Gadeeva-Moldabekovanyń «Jaılaýdaǵy kóktem» týyndysy sózimizge dálel bola alatyndaı. Kartınanyń bizdi birden jyly pikirge jeteleýiniń túp bastaýynda sol aýylǵa degen saǵynysh jatqany daýsyz.
Jalpy, qylqalam sheberiniń shyǵarmalary óte názik ári áserge toly keledi. Baıqasańyz, onyń týyndylaryna detaldardyń, rakýrstar men kompozısııanyń beıneliligin baıyptap alý tán. Sodan da bolar árbir keıipkeriniń boıynan jylylyq esip turady.
«Jaılaýdaǵy kóktem» týyndysy negizgi bastaýhaty balalyq shaq ekenin ańdap otyrmyz. Qolyna qylqalam ustaǵan sýretshi ómirinde áıteýir bir osy taqyrypqa oralatyny anyq. О́ner adamynyń boıynda qansha eseıse de baldáýren kúnniń bir belgisi qalyp qoıatyny sondyqtan. Ustaz Vasılıı Sýhomlınskııdiń «Balalyq shaq jyldary – bul bárinen buryn júrektiń esteligi» degen sózi kartınanyń ómirge kelýine negiz bolǵan syńaıly.
Balalar qashanda jańalyqqa qumar, únemi osy shaqpen ómir súredi. Kartına kompozısııasynda tóbege velosıpedin qaldyryp, qolyna dúrbi ustap otyrǵan jas balany kóremiz. Dúrbisi arqyly alystaǵy qoı órisin tamashalamaq nıette. Qarap otyrsańyz, jańa kóktegen balǵyn shóp, sheshek jarǵan usaq kók gúlder, balanyń artyndaǵy jaıylyp júrgen qoılar, solǵyn jaryq bizdi kóktemniń jyly kúnine alyp barady. Osy kartınaǵa úńile otyryp bir sátke balalyq shaqqa saparlaısyz.
