Jýyrda Memleket basshysy «2022-2024 jyldarǵa arnalǵan respýblıkalyq bıýdjet týraly» Zańǵa qol qoıdy, onda Densaýlyq saqtaý mınıstrliginiń úsh jyldyq respýblıkalyq bıýdjetiniń parametrleri bekitildi.
Bıýdjet 5 671 mlrd teńgeni qurady, onyń ishinde: 2022 jyly - 1 773 mlrd teńge, 2023 jyly - 1 934,2 mlrd teńge; 2024 jyly - 1 963,8 mlrd teńge.
Densaýlyq saqtaý vıse-mınıstri Ásem Núsipova túsindirgendeı, shyǵystardyń jalpy somasynyń 90%-dan astamyn Áleýmettik medısınalyq saqtandyrý qoryna respýblıkalyq bıýdjetten beriletin transfertter alady. Birinshi kezekte, 1 trln 211,3 mlrd teńge esebinen tegin medısınalyq kómektiń kepildik berilgen barlyq kólemi qarjylandyrylatyn bolady.
Ekinshi quramdas bóligi - bul halyqtyń osal toptary úshin memlekettiń 361 mlrd teńge mólsherindegi jarnalary.
«Men «mınıstrlik ne úshin qarajat jumsaıdy?» degen suraqqa qysqasha jaýap berýge tyrysaıyn. Medısınalyq qyzmetterdi satyp alý jospary mınıstrliktiń bıýdjettik komıssııasymen bekitilgen jáne qarjylandyrý kózderi, ózderińiz biletindeı, medısınalyq qyzmetterdiń kepildendirilgen kólemine (1211,3 mlrd teńge, memlekettiń MÁMS jarnalary (361 mlrd teńge), jumys berýshilerdiń jarnalary (280 mlrd teńge), qyzmetkerlerdiń jarnalary (172 mlrd teńge), jeke kásipkerler men jeke tulǵalardyń jáne biryńǵaı áleýmettik salyqty tóleıtin tulǵalardyń jarnalary (shamamen 20 mlrd teńge) memleket transfertteri bolyp tabylady», dedi Ásem Núsipova.
Ol MÁMS-tiń jalpy somasy 867 mlrd teńgeni quraıtynyn atap ótti. Vıse-mınıstr vedomstvonyń 20 baǵyt aıasynda qarajatty qaıda jumsaýdy josparlap otyrǵanyn túsindirdi.
«Qarajatty jumsaýdyń birinshi iri baǵyty - alǵashqy medısınalyq-sanıtarlyq kómekti qarjylandyrý, ıaǵnı barlyq emhanalyq jelini qarjylandyrý. Bul tolyǵymen TMKKK transfertteri esebinen júzege asyrylady jáne 407,5 mlrd teńgeni quraıdy. Is júzinde bul Qordyń barlyq shyǵyndarynyń besten bir bóligi. Ekinshi aýqymdy, «básekeles» baǵyt - stasıonarlyq jaǵdaıda mamandandyrylǵan medısınalyq kómekke shyǵyndar. Bul 373 mlrd teńge - is júzinde Qordyń barlyq shyǵystarynyń besten bir bóligi (18%). Úshinshi baǵyt - konsýltatıvtik-dıagnostıkalyq kómek (ambýlatorııalyq jaǵdaıda mamandandyrylǵan medısınalyq kómek), onyń shyǵyndary 231,3 mlrd teńgege jetti. Bul - ÁMSQ shyǵyndarynyń 11%-y», dep túsindirdi Á. Núsipova.
Tórtinshi negizgi baǵyt - somasy 60,9 mlrd teńgege stasıonardy almastyratyn jaǵdaıdaǵy mamandandyrylǵan medısınalyq kómek. Bul rette aýyl halqyna stasıonardy almastyratyn jaǵdaıdaǵy mamandandyrylǵan medısınalyq kómek 123,5 mlrd.teńgeni quraıdy. Jalpy soma 184,4 mlrd teńgege nemese qor shyǵystarynyń 9%-yna jetedi. Shyǵystardyń besinshi bóligi, joǵary tehnologııalyq medısınalyq kómekti qarjylandyrý - 63,9 mlrd teńge (3%).
Altynshy bólik - qan men onyń komponentterin óndirýge jumsalatyn shyǵystar 26,3 mlrd teńge somasyna jumsalatyn bolady.
Jetinshi, segizinshi, toǵyzynshy baǵyttar - AITV ınfeksııasyn juqtyrǵan adamdarǵa medısınalyq-áleýmettik kómek - 19,7 mlrd teńge, týberkýlezben aýyratyn adamdarǵa medısınalyq-áleýmettik kómek - 39,7 mlrd teńge, psıhıkalyq, minez-qulyq buzylýlary (aýrýlary) bar adamdarǵa psıhıkalyq densaýlyq salasyndaǵy naýqastarǵa medısınalyq kómek - 40,8 mlrd teńge. Eger osy úsh baǵytty birge qossaq - bul 100,2 mlrd teńge.
«Onynshy baǵyt - baǵdarlamalyq dıalız. Oǵan 39,6 mlrd teńge bólý kózdelgen. On birinshi baǵyt - jedel medısınalyq kómek. Ol kepildendirilgen kólemge transfert esebinen tolyq qarjylandyrylady jáne 76,3 mlrd teńgeni quraıdy. Bul barlyq ÁMSQ shyǵyndarynyń shamamen 4%-y. On ekinshi baǵyt - pallıatıvtik medısınalyq kómek – 5,8 mlrd teńge, on úshinshi baǵyt - patologoanatomııalyq dıagnostıka, bul qyzmetterge shyǵyndar 3 mlrd teńgeni quraıdy. On tórtinshi - ınfeksııalyq aýrýlarmen aýyratyn naýqastarǵa medısınalyq kómek kórsetýge jumsalatyn shyǵystar 64 mlrd teńgeni quraıdy. On besinshi, on altynshy baǵyttar - onkologııalyq aýrýlarmen aýyratyn naýqastarǵa medısınalyq kómek 71,8 mlrd teńge, al onkogematologııalyq naýqastarǵa - 20,4 mlrd teńge somasynda qarjylandyrylady. On jetinshi baǵyt - bul medısınalyq ońaltýǵa jumsalatyn shyǵyndar, olar 66,8 mlrd teńgeni quraıdy. On segizinshisi - shetelde emdelý. Buǵan 3,5 mlrd teńge jumsaý josparlanyp otyr», dedi spıker.
Shyǵystardyń taǵy bir iri baǵyty ambýlatorııalyq dári-dármekpen qamtamasyz etýge arnalǵan shyǵystar bolyp tabylady. Olar 140,3 mlrd. teńgege jetedi, bul - ÁMSQ shyǵyndarynyń 7%-y. Sonymen qatar jalaqynyń ósýine 171 mlrd teńge bólinedi, bul ÁMSQ barlyq shyǵystarynyń 8,5%-ǵa jýyǵy.
