«Azamattarǵa arnalǵan úkimet» memlekettik korporasııasy» KeAQ-nyń Atyraý oblysy boıynsha fılıalynyń dırektory Mýsa Haırýllıevtyń málimetinshe, «Súıinshi» syıqorabynda Prezıdent Qasym-Jomart Toqaevtyń quttyqtaý tilegi jazylǵan ashyq hat, «Táýelsiz Qazaqstanǵa 30 jyl» monetasy men balanyń týýy týraly kýáligi salynǵan.
«Prezıdenttiń quttyqtaý hatynda «Aınalaıyn, bóbek! Seniń týǵan kúniń elimizdiń eń basty merekesimen tuspa-tus keldi. О́ziń dúnıe esigin ashqan kezde halqymyz qasterli Táýelsizdiginiń 30 jyldyǵyn atap ótip jatty. Saǵan baqytty ári uzaq ǵumyr tileımin!» dep jazylǵan. Bul quttyqtaý hat 16-17 jeltoqsanda týǵan balalardyń elge adal qyzmet etetin otanshyl bolyp ósýine yqpal etedi.
Atyraý oblysynda osyndaı «Súıinshi» syıqorapty 84 sábıge tabystadyq. Mereke kúnderi Atyraý qalasynda 73, Jylyoı aýdanynda 4, Qyzylqoǵada – 3, Qurmanǵazyda – 2, Maqatta – 1, Inder aýdanynda 1 náreste ómirge keldi», deıdi Mýsa Haırýllıev.
