Jasyl jaılaýda aýnap-kúlgen adam sol bir aıaýly sátti máńgilik tumaryndaı janynda saqtary anyq. Onyń ústine oshaq basyndaǵy ystyq kúlsheniń ıisi álemniń barlyq átirinen qymbat. Janyńdy jylytady, meıirim tógedi. Sýretshiler odaǵynyń múshesi, belgili sýretshi Jańataı Shardenovtiń «Tańerteń» kartınasy bizdi sol beımaral shaqtarmen qaıta qaýyshtyrǵandaı.
Qylqalam sheberi tabıǵat sýretin salýǵa qushtar. Onysy erekshe shyǵady. Týyndylarynyń kópshiligi tikeleı tabıǵattyń ózinde jazylǵan. Onyń jumystaryn boıaýdy aıamaı jaǵýyna, názik úılestirilgen tústerge, batyl kóńil kúıge qarap ońaı tanýǵa bolady. Eń ǵajaby, ol ashyq kúlgin, qońyr-jıren, kógildir-sur, boz-jasyl syndy tústerdiń kúrdeli úılesiminiń názik sáýlesinen ózine tartyp alatyn sulýlyqty kóre bildi.
Baqsańyz, «Tańerteń» kartınasynyń túkpirine kıiz úıdiń qasyndaǵy peshke as daıyndap jatqan áıeldi beıneleı otyryp, jaılaýdaǵy qazaq ómiriniń tynyshtyǵy men berekesin jetkizgen. Alysta taýdyń eteginde shopannyń sulbasy men qalyń shópke ja-ıylyp júrgen mal baıqalady. Kartınanyń aldyńǵy planyndaǵy jasyl shóp báseńdep baryp kókjıektegi qar basqan kógildir taýlarǵa baıaý aýysady.
Avtor kartınany ashyq tústerden qasha otyryp, ózine tán qalypta boıaýdy jalpaq qarqyndy tehnıkamen qalyń etip jaǵý arqyly jazǵan. Jeldiń tolqynynan shópter terbetilip turǵandaı áser beredi. Úlken keńistik pen taza aýa sezetindeısiz.
Jańataı Shardenovtiń kartınalaryna qaraǵan saıyn odan onyń jany, meıirimdiligi, úılesimdilikke, tabıǵatqa umtylysy, týǵan jerine degen súıispenshiligi seziledi.
