Otyrys kezinde bul zań elimizde ólim jazasyn qoldaný aıasyn kezeń-kezeńmen qysqartýǵa baǵyttalǵan jumystyń laıyqty jalǵasy ekeni atap ótildi. Memleket basshysy qarasha aıynda ótken Ulttyq qoǵamdyq senim keńesiniń otyrysynda Qazaqstanda ólim jazasy qandaı da bir eskertpesiz joıylýǵa tıis ekeni aıtqan edi. Sondyqtan bul zańnyń qabyldanýyn senatorlardyń el Prezıdentiniń tapsyrmasyn oryndaýdyń naqty nátıjesi jáne qoǵamdy alańdatqan saýalǵa berilgen jaýap retinde qabyldaýǵa bolady.
«Osy zańdy qabyldaı otyryp, Qazaqstan ólim jazasyna zań júzinde tyıym salǵan elder tobyna qosyldy. Sondaı-aq elimiz ólim jazasyn tolyǵymen joıýǵa arnalǵan halyqaralyq qozǵalysty qoldaıtynyn zań arqyly dáleldep otyr», dedi Senat Spıkeri.
Aıta keteıik, 2003 jyldan bastap Qazaqstanda ólim jazasyna moratorıı jarııalanǵan bolatyn. Kelesi 18 jyl ishinde ólim jazasy túrindegi jaza qoldanylýy múmkin qylmystar úshin baptardyń tizimi kezeń-kezeńimen qysqartylyp otyrdy. Bul shara Qylmystyq kodekstiń sońǵy mátininde qylmystyń 17 túri boıynsha kózdelgen edi.
