– Mundaı sharany biz alǵash byltyr kóktemde ótkizip kórgenbiz. Biraq ol joly ádebı marafonǵa jasóspirimder ǵana qatysty. Balalar Paýlo Koelonyń, Djerom Selındjerdiń, Marıam Petrosıannyń shyǵarmalaryn oqydy. Byltyr sharaǵa qatysýshylar sany kóp bolmady. О́ıtkeni biz tikeleı efır arqyly áleýmettik jelilerge shyǵyp, marafondy onlaın túrinde de ótkizdik. Bıylǵy oqyrmandar marafonyna kez kelgen jastaǵy turǵyndar qatysa alady. Bul joly sál ózgesheleý túrde ótkizgimiz keledi. Eger epıdemııalyq ahýal múmkindik berse, sharanyń sońyn aýqymdy pikir alysý jıynymen qorytyndylamaq oıdamyz. Jıynda aıtylǵan oı-pikirlerdiń bári kitaphananyń saıtynda jarııalanatyn bolady, – deıdi kitaphana qyzmetkeri Tatıana Tıhomırova.
Oqýǵa usynylatyn kórkem shyǵarmalar romantızmnen bastap postmodernızmge deıingi ár alýan ádebı dáýirlerdi qamtıdy. Taqyryp turǵysynan da, janry jaǵynan da ár alýan. Máselen, bıylǵy marafonda oqylatyn kitaptardyń ishinde Ernest Hemıngýeıdiń «Shal men teńizi», Frans Kafkanyń «Prosess» romany, Mıhaıl Býlgakovtyń «Jas dárigerdiń jazbalary», Vıktor Pelevınniń «Omon Ra» romany, Sergeı Dovlatovtyń «Chemodan» áńgimeler jınaǵy bar. Oqyrmandar kitaphanaǵa kelip, atalǵan kitaptardyń ishinen bireýin tańdap alǵan soń, shyǵarmany bir aıdyń ishinde oqyp shyǵýy tıis.
Kitaphana ujymy atalǵan sharalardy jıi uıymdastyrý arqyly kópshiliktiń kórkem ádebıetke degen qyzyǵýshylyǵyn oıatyp, kitaphana qabyrǵasynda oqyrmandar klýbyn jandandyrǵysy keledi. Marafon bir aıǵa sozylady. Tatıana Tıhomırovanyń aıtýynsha, qazirdiń ózinde kitaphanadan oqyrmandar marafonyna qatysamyn dep kelgen otyz shaqty adam kitap alyp ketken.
Qostanaı oblysy
