Belgili sýretshi Marat Turǵambaıdyń «Keshkilik» kartınasy áıel obrazyna qurylǵan. Keıipkerdiń sulýlyǵyn tabıǵatpen úndestirip, ony aqyl tarazysyna salǵan sheberdiń týyndysy úlken ińkárlikten bastaý alǵany kórinip tur. Bul – avtordyń mýzasy bolýy da múmkin. Sebebi model birneshe kartınasynda kezdesedi.
Boıaýdyń qyr-syryn tereń meńgergen sýretshi beıneleý ónerin ulttyq dástúrmen sabaqtastyryp, portret somdaýda jigerli kúsh jumsady jáne ony gıperrealızmmen baılanystyrdy. Atalǵan kartınadan sony baıqaýǵa bolady.
Sýrettegi arý aq tústi vodolazka, qyzyl daqtarmen sándelgen uzyn beldemshe kıip, qońyrqaı tústi shálisin ústine jamyla sýrettelgen. Basyn tik kótere ustap ópken jeldiń yrǵaǵyn sezinýde. Oń qolyn názik ári jumsaq betine álsin tıgizse, sol qolyna kitap ustaǵan. Keıipkerdiń bet-álpetine jaǵylǵan boıaýǵa qarap, onyń zamanǵa saı ádeptelgenin ańǵarýǵa bolady.
Janaryn tómen qadap, jupar aýany meıirlene jutyp, ishki emosııasyn syrtqa shyǵarýda. Bul onyń baqytty sátiniń bir beketi sekildi qýanyshtan basy aınalardaı shalqyp otyr. О́z sezimine ózi mastanyp, bir ǵajaıyptyń bolatynyn aldyn ala sezgendeı. Kózqarasynan azdap kúrsinis te baıqalady.
«Keshkilik» kartınasy tek kompozısııanyń negizi bolyp turǵan keıipkerge ǵana nazar aýdartady. Al artqy plan tek ashyq tústermen ǵana sheshim tapqan. Keneptegi oqyrman qyzdyń bir sáttik kóńil kúıi qylqalam ushynda terbelip turǵandaı qaıran qaldyrady. Sýretshi bálkim aqyn bolsa:
«Muńaımashy,
Túspesin eńseli arman.
Yqylasyn bir saǵan aýdarar em,
Yńǵaıyma osy bir kónse jalǵan»,
dep jazar ma edi!? Sulýǵa suqtaný súndet emes pe?
