Qaıyńdar bıi

Kúreń kúzdiń qushaǵynda balqyǵan tabıǵattyń tamasha syıy. Kórgen adam kóńil bólmeı ketpes keremettiń naq ózi. Qarańyzshy, tabıǵat qan­daı uqypty, artyq eshteńe joq, tek jaratylystyń jań­ǵyryǵy ǵana estiledi. Al­tyn topyraqqa tamyryn jiberip, burala bitken aq qaıyńdar alys­taǵy bizdi de alapat kúı­ge bóledi. Belgili sýretshi Qa­lıol­la Ahmetjannyń qyl­qa­­la­mynan týǵan kórinis sol bir shýaqty shaqtyń sálemi ispetti.

Japondyq grafıkanyń tehnıkasyn tereń meńgergen sýretker shyǵarmashylyq iz­de­nis jolynda jańa baǵyt syz­dy. HIH ǵasyrda Fransııa elinde qarqyndy damyǵan «pýan­tılızm» stılin qazaq beıneleý ónerine alyp kelgen sheber tabıǵattan shabyt aldy. Ol qalyń orman ishinen bala kúninde júregine uıa salǵan armandaryn izdedi. Jazyq dalaǵa, taý bókterine bar mahabbatyn arnady.

Baqsańyz, «Qaıyńdar bıi» kartınasynda qoldanǵan tústeriniń qosyndysy bir-bi­rimen úılesim taýyp, tepe-teń­digin saqtaı kele, jaryq pen kóleńkeniń aıyrma­shy­ly­ǵyn ońaı sheshedi. Kom­po­zısııanyń negizgi qozǵaý­shy kúshi – tús pen forma. Formany izdestirý nátıje­sinde qylqalam ıesi ózine ǵana tán keskindeme tehnıkasyn qurastyrdy.

Jalpy, tabıǵat kórinisteri avtordyń súıikti motıvterine jatady. Onyń basty sebebi – shyǵystyq dástúrli beıneleý ónerine degen qyzyǵýshylyǵy. Ásirese, qytaı, japon she­ber­leriniń peızajdaryna tamsandy. Onyń ishinde olar­dyń sımvolıkalyq mánine basa nazar aýdardy. Máse­len, qaraǵaı men qaıyń – kór­kemdiktiń, beriktiktiń jáne suńǵaqtyqtyń sımvoly bolsa, taý – álem sımvolyna aınalǵan úlken fılo­sofııalyq mánge ıe.

 Qylqalam sheberi árbir kartınasynda tabıǵat qu­pııa­syn tabýǵa tyrysady. Jaqynnan qarasańyz, boıaý strýk­týrasyn, ár qabattaǵy tústerdiń baılanysyn kórýge bolady. Munda avtordyń jeke qoltańbasy men ózindik pikiri bar.