Qoǵam • 09 Aqpan, 2022

Qazaqstanda quqyq qorǵaý qyzmetine qabyldaý talaby kúsheıtiledi

48 ret kórsetildi

Májilistiń jalpy otyrysynda Bas prokýrordyń orynbasary Áset Shyndalıev quqyq qorǵaý qyzmetin jetildirý boıynsha zań jobasyn tanystyrdy, dep jazady Egemen.kz.

«Barlyq organ úshin kadrlyq prosesti, qyzmetkerlerge qoıylatyn talaptardy birdeı etý kerek. Onyń ishinde qyzmetkerlerdi kótermeleý, jaza qoldaný, ataq-shender berý, arnaıy organdardan aýysý, attestasııalaý jáne jumysyn baǵalaý máseleleri. Osylardy retteý maqsatynda zań jobasy ázirlendi», dedi Bas prokýrordyń orynbasary.

Bas prokýrordyń orynbasary Áset Shyndalıev usynylǵan Zań jobasynda quqyq qorǵaý qyzmetine qabyldaný talaby kúsheıtiletinin aıtty.

«Birinshi másele – qyzmetke qabyldaý tártibin ońtaılandyrý. 2019 jyly depýtattardyń qoldaýymen zańǵa túzetýler jasalyp, tómengi laýazymdarǵa kadrlar daıyndaýdyń jańa tártibi engizildi. Qazir tómengi qyzmetterge alý úshin jas mamandar mindetti túrde quqyq qorǵaý akademııalaryn bitirýi tıis. Al endi orta jáne joǵary laýazymdarǵa quqyq qorǵaý jáne arnaıy organdarda, memlekettik jáne áskerı qyzmette buryn bolǵandar, sýdıalar qabyldanady. Olar konkýrs arqyly jáne konkýrstan tys tártipte qyzmetke alynady», dedi Áset Shyndalıev.

Konkýrs arqyly negizinen aǵa basshysy quramdarǵa jetkilikti tájirıbesi bar adamdar taǵaıyndalady. Olardy taǵylymdamadan ótkizýdiń qajeti az. Sol sebepti zań jobasy konkýrs boıynsha taǵaıyndalǵan kandıdattar úshin taǵylymdamany alyp tastaýdy usynady. Al arnaıy tekserýden konkýrstan soń ótedi. Bul túzetýler qyzmetke qabyldaý prosesin tezdetý, qajet mamandardy jumysqa alýdy jyldamdatýǵa múmkindik beredi.

«Qazir konkýrstan tys oblystyq quqyq qorǵaý organdarynyń bastyqtary qabyldasa, endi tek ortalyq organ basshysy ǵana qabyldaıdy. Qabyldaý talaptary da kúsheıtiledi. Endi qyzmetke alý úshin 3 jyl staj kerek bolady. Al áskerde qatardaǵy soldat bolǵandar jalpy negizde qabyldanady. Kúshtik organdarǵa jumys istep júrgen qyzmetkerler quqyq qorǵaý salasyna aýysý arqyly qabyldanady», dedi ol. 

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar