Keıde beıneleý ónerin nemese bir sýretshi jaıly aıtý úshin tereń oıdyń qoınaýyna súńgigińiz keledi. О́ıtkeni keshegilerdiń kelisti keskindemesin, kesteli oıyn bylaı qoıǵanda, dara darynyn ańsaýmen kelemiz. Qazaq ózi teńizdiń dámin tamshysynan tushyna biletin sezimtal halyq qoı. Sodan ba jarq etken dúnıe kórse jaqsylyqqa jorıdy. Biz búgin sol kúıdi qaıta keshtik. Qashan deseńiz? Qazaqtyń belgili sýretshi qyzy Aıgúl Hakimjanovanyń shyǵarmashylyǵyna úńilgen sátte.
Qylqalam sheberi árbir jumysyna ıdeıany ǵajaıyp tústeı ǵaıyp bolǵan balalyq shaqtyń bazarynan izdeıdi. Sol móldir sáttiń aıaýly estelikteri sana bıiginde jańǵyryp, kenep betinde sheber stılıstıkalyq sheshim tabady. Jan álemi súıispenshilik pen meıirimge toly sheberdiń kóńil aıdyny laılanbaı, tazalyqtan nár alatyny anyq. Bul – has sýretker bolýdyń alǵysharty. О́ner ıesi adam janynyń jylýyn dál, anyq beretin pastel tehnıkasyn artyq kóredi. Onyń ereksheligi de sonda.
Biz mysalǵa alǵan «Esik taý bókterindegi tań» kartınasy 2013 jazylǵan týyndy. Peızajda sýretshiniń sezimi, kóńil kúıi, túsinigi, tabıǵatqa degen estetıkalyq, etnostyq kózqarasy ańǵarylady. Adam ómirimen salystyryp qaraǵanda tabıǵat ómiri máńgilik. Sýretshi atalǵan shyǵarmasy arqyly tabıǵattyń minez-qulqyn ulttyń bolmys-bitimimen astastyryp jazǵan. Túster palıtrasy tabıǵattaǵy boıaýlar men jaryqtyń qubylýyn dál kórsete alǵan.
Aıgúl Hakimjanova óz shyǵarmashylyǵynda tabıǵatty tikeleı tamashalap, tústerdiń ózgeshe tustaryn kórsete otyryp, erekshe áserlikke, jańashyldyqqa qol jetkizdi. Túspen jáne formamen, keńistikpen jáne syzyqpen batyl jumys istedi. Rýhtyń kúshimen órile bitken jigerli de kórkem, sıqyrly obrazdar týdyrdy. Eń ǵajaby, onyń kartınasynda ulttyq kolorıt basym.
