Aqtóbe oblysyndaǵy 4 kolledjdiń, ıaǵnı Aqtóbe joǵary polıtehnıkalyq kolledji, Aqtóbe gýmanıtarlyq kolledji, Aqtóbe kólik, kommýnıkasııa jáne jańa tehnologııalar kolledji, Aqtóbe joǵary aýyl sharýashylyǵy kolledjiniń dırektory qaıta taǵaıyndaldy.
Sheshimdi memlekettik tehnıkalyq jáne kásiptik bilim berý uıymdarynyń basshylaryn rotasııalaý jónindegi komıssııa qabyldady. Kolledjderdiń jańa dırektorlarynyń aldyna bilim berý sapasyn arttyrý jáne kadrlardy daıarlaýdy kúsheıtý mindetteri qoıyldy.
«О́tken jyly mınıstrlik memlekettik bilim berý uıymdarynyń birinshi basshylaryn rotasııalaý erejelerin bekitti. Buǵan deıin úlken jumys atqaryldy, normatıvtik quqyqtyq aktilerge ózgerister engizildi. Bıyl biz mektepter men kolledjderdiń dırektorlaryn rotasııalaýdy bastadyq. Bir uıymda 15-20 jáne odan da kóp jyl jumys isteıtin menedjerler bar. Bul ýaqyt ishinde olardyń tıimdiligi tómendeıdi. Rotasııanyń oń áserleri týraly osyǵan deıin de aıtyldy.
Mysaly, bul birden birneshe bilim berý uıymynda tıimdi basqarýshylardyń áleýetin arttyrýǵa múmkindik beredi. Sonymen qatar ol sybaılas jemqorlyq táýekelderin azaıtýǵa múmkindik beredi. О́kinishke qaraı, eger adam kóp jyldar boıy bir uıymdy basqarsa ondaı problema týyndaýy múmkin», dep atap ótti birinshi vıse-mınıstr Sholpan Karınova.
Ereje boıynsha rotasııa bir bilim berý uıymynda 4-7 jyl jumys isteıtin balabaqshalardyń, mektepterdiń, kolledjderdiń dırektorlaryna qoldanylady. Bul rette bir bilim berý uıymynda 4 jyl qyzmet atqaratyn birinshi basshy rotasııadan bas tarta alady. Biraq eger dırektor 7 jyldan astam ýaqyt jumys istese, onda ol mindetti túrde rotasııalanady.
«О́ńirlerdiń bilim basqarmalary bilim berý uıymdarynyń birinshi basshylaryn rotasııalaýdy bir eldi meken ishinde júrgizedi. Sonymen qatar qaıta taǵaıyndaý bir tıptegi uıymdardyń basshylary arasynda júzege asyrylady.
Budan bólek, rotasııa kezinde birinshi basshylardyń biliktilik sanaty saqtalady. Rotasııa ınstıtýty bilim berý uıymdaryndaǵy menedjmentti jaqsartýǵa jáne birinshi basshylardyń tıimdiligin arttyrýǵa múmkindik beredi dep kútilýde», delingen BǴM habarlamasynda.
