«Ańshy men qus» kartınasyna qarap, bir áńgime esime túsip turǵany. Jańylyspasam jazýshy Raqymjan Otarbaevtyń «Shyńǵys hannyń kóz jasy» atty hıkaıaty-aý deımin. Sonda uly joryqqa attanǵan qalyń túmen júgirgen ań, ushqan qusty azyq etip, ash ózegin jalǵaıdy. Dese de kezikkenin qynadaı qyrýǵa ruqsat joq. Shyńǵys hannyń pármeni sondaı. Jylt etken kóktemnen qara kúzge deıin qarý kótertpeıdi. «Ań tólin, qus balapanyn órgizer shaq. Tuqymy úzilmesin, alańsyz aıaqtansyn, túbitin túsirsin» degen tilek. Al qarashanyń qatqaǵynan ógizdiń ózin ókirtken aqpannyń aıaǵyna deıin qalaı aýlasań da erkiń. Qolyn qaqpaıdy. Bul biz mysalǵa alǵan shyǵarmanyń shyndyǵy.
Baqsańyz, tanymal sýretshi Alpysbaı Qazyǵulovtyń «Ańshy men qus» kartınasy abstraksıonızm jáne sıýrrealızm stılinde jazylǵan. Ol jabyq qoıý tústerdiń jarqylyna adamnyń kishkentaı pishiniń qarama-qaıshy qoldanady. Boıaý aǵynymen júzgen sańylaýly aspannyń túnerýi dúnıege tóngen qasiretten habar berip turǵandaı.
Kenep betindegi kompozısııa eki bólimnen turady. Biz oń jaqtaǵy kórinisten qus qanaty men sadaǵyn tómen túsirip, tik turǵan er adamnyń sulbasyn kóremiz. Kókjıekke engen qyzyldy-saryly kún sáýlesine qarap jerdiń tegis ekenin baıqaýǵa bolady. Sýretshi eki bólikti aıqush-uıqysh boıalǵan qaýyrsyndar arqyly ajyratady. Biz ushqan qusty emes, tek túster arqyly álem-jálem boıalǵan kenep betine qıǵash ornalasqan eki qanatty kóremiz. Olardyń ishinde qyzyl-qara tústisi ushýǵa talpynǵan qustyń janaıqaıyn beredi. Kartınanyń bul bóligi jaısyzdyq jáne azapty sezim syılaıdy, qazir ǵana bolǵan qasiretti sezdiredi.
Sýretshi óz kartınasynda tús, syzyq jáne kompozısııa arqyly kóńil kúıdi, jan terbelisin berip, qııaldaý men elestetý úshin keńistikti qaldyrady. Bulyńǵyr kórinister oqyrmandy ártúrli oıǵa jeteleıdi. Shynynda sheberdiń oılaǵany da sol bolatyn.
