«Qazir jappaı tártipsizdik kezinde jaraqat alǵan bir polıseıdiń jaǵdaıy aýyr. Oǵan kúrdeli ota qajet. Al ózge qyzmetkerler aýrýhanadan shyqty» deıdi Abzal Gılım.
Onyń aıtýynsha, oblystyq ákimdiktiń ǵımaratyna shabýyl kezinde polısııa qyzmetkerlerinen 9 atys qarýy tartyp alynǵan. Qazir onyń tórteýi keri qaıtarylǵan.
«Jappaı tártipsizdikke qatysýshylar 1 myńnan astam qalqan, kaska jáne basqa da arnaıy quraldardy zańsyz ıemdengen. Tartyp alynǵan quraldardyń 52-si tabyldy. Al qalǵanyn izdeý jalǵasyp jatyr. Sol sebepten, turǵyndardan urlanǵan qarýlar men arnaıy quraldardy polısııaǵa tapsyrýǵa shaqyramyn. Qarýdy erikti túrde tapsyrǵan azamattar zańmen qýdalanbaıdy» dep málim etti ol.
Arnaıy prokýrorlardyń basshylyǵymen vedomstvoaralyq jedel-tergeý toptary jappaı tártipsizdikke qatysty 28 qylmystyq isti tergep jatyr.
«Onyń ishinde terrorızm aktilerine qatysty 2, jappaı tártipsizdikterdi uıymdastyrý jáne qatysýǵa baılanysty 10, bılikti basyp alýǵa shaqyrý deregimen 1 qylmystyq is bar. Sondaı-aq, polısııaǵa qarsy kúsh qoldaný boıynsha 2, qarýdy urlaýǵa qatysty 1 qylmystyq is tergelip jatyr. Jappaı tártipsizdikke qatysýshylardyń is-áreketi jazylǵan beınejazbalardyń barlyǵy zerdelendi. Zardap shekkender men kýálardan jaýap alyndy. Sot sanksııasymen 25 adamǵa bultartpaý sharasy retinde qamaýǵa alý qoldanyldy. Bir adam úı qamaqta otyr» deıdi Abzal Gılım.
