Qaraǵandyda mektep múlkin bas paıdasyna jaratqan dırektor ustaldy

Qaraǵandy oblysynyń qarjy polısııasy mektep múlkin bas paıdasyna jaratqan dırektordy ustady. Bul týraly «Habar» telearnasy habarlady. Qarjy polısııasy Ulytaý aýdandyq bilim berý bóliminiń ákimshisi men №18 mektep dırektorynyń ústinen qylmystyq is qozǵady. Olar mekteptegi 130 tonna kómirdi satyp, odan túsken aqshany qaltalaryna salǵan. Osyǵan baılanysty bilim bóliminiń sheneýnigi men mektep dırektoryna qatysty qarjy jymqyrý jáne senip tapsyrylǵan múlikti talan-tarajǵa salý faktisi boıynsha aıyp taǵylyp otyr. Ekeýine de kepildik túrindegi bultartpaý sharasy qoldanyldy. «Qarjy polısııasy departamenti jedel izdestirý sharalary barysynda Ulytaý aýdandyq bilim berý bóliminiń ákimshisi men osy jergilikti jerdegi №18 orta mektep dırektory tarapynan senip tapsyrylǵan múlikti urlaý jáne ysyrap etý faktisin anyqtady. Naqty aıtqanda, olar jalpy somasy jarty mıllıon teńgeni ózara bólisip alǵan»,-deıdi oblystyq qarjy polısııasy departamentiniń baspasóz hatshysy Gúljan Súleımenova. Ámirhan Almaǵanbetov. Derekkóz: «Habar» telearnasy. Foto: www.Ktk.kz.