Osy oraıda, aıtpaǵymyz, kúlli qazaqqa aty máshhúr taekvondoshy Mustafa Qabenuly (О́ztúrik) osy Qaıysbaı balýannyń úlken qyzy Razııadan týady. Bul apamyz sińlisi Zarııamen birge 1940-shy jyldary Altaıdan el úrikkende Aqsaı-Gansý jaqqa aýyp baryp, ári qaraı Úndistan ótip, Túrkııaǵa jetip, sońynda Eýropadan bir-aq shyqqan. Bul óz aldyna úlken tarıh. Jaryqtyq apamyz osydan bes-alty jyl buryn dúnıeden ótti.
Sonymen aıtpaǵymyz, Qaıysbaı balýan 19 jasynda jarysqa túsip, Barkól-Morıdiń «Aqtas» jaılaýynda uıǵyrdyń ataqty balýany Nasyrdy jyǵyp ataǵy shyqsa, odan keıin Altaı-Qobdanyń qazaq-qalmaq qatysqan dúbirli toıda oırattyń joıqyn kúsh ıesi Donǵara balýandy jeńip, teńdessiz kúsh ıesi atanǵan eken.
Jalpy, qazaq saltynda kúsh ıesi balýan ózinen keıingi urpaqqa myqtylyǵyn pash etý úshin aýyr tasty kóterip belgi retinde kórnekti jerge qoıyp ketetin dástúr bolǵan. Mysaly, Qaba-Býyrshyn óńirinde ataqty Qoılybaı balýannyń kótergen tasy tursa, elimizdiń tarıhı óńiri Baıanaýylda Qajymuqan Muńaıtpasov atamyz kótergen tas aýdandyq ólketaný murajaıynyń aldynda tur.
Osyndaı úrdisti Qaısekeń de attap ótpepti. Birde balýan atamyz Tóleýbaı bıdiń alqaýymen úlken asqa baryp, kúresip, bas báıgege ıe bolyp kele jatqan jolynda kóregen bı Qaısekeńe qaratyp: «Artyńyzǵa bir belgi qaldyryp ketseńiz bolmaı ma? Bolashaq urpaq sizdiń kúshińizdi kórip, qýatyńyzdy baǵalasyn», deıdi.
Sóıtip, el aǵasynyń ótinishin qabyl alǵan Qaısekeń aǵyp jatqan ózenniń arǵy jaǵasyndaǵy úlken aq sur tasty qushaqtaı kóterip ákelip, jaqyn jerdegi tóbeshikke shyǵaryp qoıǵan eken. Bul kezde balýan shamamen 37 jasta bolypty.
Tas qazir Qytaıdyń Morı aýdany «Asyrqaı» aýylyna baratyn joldyń jıeginde jatyr. Myna sýrette tasty qushaqtap turǵan áıel Qaıysbaı atamyzdyń qyzy Zarııa. Bul apamyz 1981 jyly 26 maýsymda Shvesııanyń Stokgolm qalasynan týǵan jerine kelip, ákeden qalǵan kóz aq sur tasty qushaqtap, maýqyn basyp turǵan sáti.
Jalpy, Qaıysbaı atamyz qartaıǵan shaǵyna deıin boıynan kúshi ketpegen eken. Bul áńgime Qaıysbaı balýannyń ómirinen oıyp alynǵan bir ǵana úzik syr. Áli de bizge jetpegen erlikteri jeterlik.
