Qoǵam • 14 Naýryz, 2022

Asanáli Áshimov bastaǵan aqsaqaldar toby úndeý jasady

757 ret kórsetildi

Almatylyq aqsaqaldar Prezıdentke úndeý jasady, dep habarlaıdy Egemen.kz.

- Qurmetti jerlester! Almatylyq jastar!

Biz, Almaty qalasynyń aqsaqaldar qaýymy qazir qoǵamda bop jatqan keıbir jaǵdaılarǵa qatysty asa alańdaýlymyz. Rasyn aıtý kerek, kútpegen jerden  bastalǵan «qaıǵyly qańtar» oqıǵasy barshamyzdy eseńgiretip ketti. «Egemendik alyp, eńse tikteý áste-áste, eldikten aıyrylyp qalý bir sátte» ekendigin kórdik. Syrttan synalap kirip, qoǵamdy ishten iritkisi kelgen qaskúnemder men qylmyskerler táýelsizdigimizdiń tuǵyryn shaıqap, tóńkerip tastaı jazdady. Prezıdentimizdiń der kezinde qabyldaǵan shuǵyl sheshimderi arqasynda, batyl táýekelge baryp, shıraq qımyldaǵanynyń nátıjesinde ǵana kıeli azattyǵymyzdy saqtap qala aldyq. Qoǵam ishinde júrip, qarapaıym turǵyndarmen kúndelikti kezdesip júrmiz. Sol azamattar qazir kóshede toptasqan adamdar toby kórinse, úreılenip, shoshıtyndaryn aıtady. Beıbit halyq qatty qorqyp qalǵan. Ásirese, Almaty qalasy sodyrlardyń soıqanynan kóp zardap shekti. Qanshama ǵımarat órtke oranyp, saýda oryndary tonalyp, adam shyǵyny oryn aldy. Búgingi tańda qala ákimdigi sol oqıǵalardyń saldaryn joıýǵa baryn salyp jatyr. Qıraǵan, órtengen ǵımarattar men saýda oryndaryn qalpyna keltirip, shyǵynǵa batqan kásipkerlerdi qoldap, jastarǵa jańa jumys oryndaryn ashýǵa árekettenýde.

Bizge qazir osy ótken oqıǵalardy durystap saralap, salqyn aqylmen, salıqaly sabyrmen ketken qateliktermen jumys jasaý qajet. Ol úshin qoǵamnyń tynyshtyǵy men turaqtylyǵy asa mańyzdy.

О́kinishke qaraı, keıingi kezde, Almatymyzda sherýletken mıtıngiler men aıqaıǵa attan qosqan jıyndar qaıtadan kóbeıip ketti. Onyń ózi baıyrqaly jıyn, basalqy keńes qurý bolsa quba-qup. Qalyń toptyń ortasyna kirip alyp, keıbir teris pıǵyldy, aram oıly arandatýshylar el arasyna iritki salatyn urandar kóterip, qoǵam shańyraǵyn shaıqap, birligimizdi iritýdi kózdegendeı.

Sóz joq, qazaq halqynyń tarıhynda «Kúltóbeniń basynda kúnde jıyn jasaıtyn» zaman boldy. El aǵalary bas qosyp, alqa quryp aqyl-keńesterimen bólisti. Biraq, onyń basty ereksheligi – jón sózge toqtaıtyn halyq boldy. Ataly sózge qulaq asyp, paryqty pikirge bas ıetin minez bar edi. Búgingi bas qosýlar kerisinshe dańǵaza dabyr men beıpil sózderge ulasyp, qısyq-qyńyr, qysyr qıqýlarǵa tolyp ketti. Oıǵa alýdyń ózi uıat sanalatyn anaıy sózderdi qaǵazǵa jazyp, uran qylyp uıalmaı kókke kóterýdi sán kóretin sıyqsyz salt paıda boldy.

Búgingi ýaqyt aýmaly-tókpeli zaman bolyp tur. Aınalymyzdaǵy memleketterdiń tynyshtyǵy bir sátte buzylyp, beıbit turǵyndary shubyryp, memleketi soǵys otyna oranyp jatqanyn kórip jatyrmyz. Bizge qazir ishki tynyshtyq pen myzǵymas turaqtylyq aýadaı qajet. Jastardy, jalpy qoǵamdy sabyrǵa shaqyramyz! Etek-jeńimizdi jıyp, qazirgi ótpeli kezeńde judyryqtaı jumylyp, uıymshyldyq tanytaıyq. Aınalamyzda, el ishinde oryn alyp jatqan keıbir qıynshylyqtardyń barlyǵy ýaqytsha.  El Táýelsizdiginiń kepili – tatýlyq pen birlikte. Elimizdiń tynyshtyǵy buzylmasyn deımiz. Bizdiń atalyq tilegimiz, aqsaqaldyq nıetimiz osy. El ishine kirip, ylań salýy kózdeıtin arandatýshylardan saq bolaıyq. Qoǵam bolyp jumylyp, birtutas halyq  bolyp birigip, Prezıdentimizdiń aınalasyna toptasa alsaq ýaqytsha synaqtardyń barlyǵyn erkin eńseremiz. Elimiz aman, jurtymyz tynysh, zamanymyz beıbit bolsyn!, - delingen úndeýde. 

Qol qoıǵandar

  1. Asanáli Áshimov
  2. Murat Áýezov
  3. Dýlat Isabekov
  4. Kádirbek Segizbaev
  5. Smaǵul Elýbaev
  6. Beksultan Nurjekeev
  7. Sáýle Dosjan
  8. Sát Toqpaqbaev
  9. Júrsin Erman
  10. Temirhan Medetbek
  11. Zeınep Ahmetova
  12. Marfýǵa Aıthojına
  13. Aıagúl Mırazova
  14. Aqan Bıjanov
  15. Naǵashybek Qapalbekuly

Kelisip, qoldaǵandar

  1. Tóregeldi Sharmanov
  2. Mekemtas Myrzahmetov
  3. Sábıt Orazbaev
  4. Altynbek Qorazbaev
  5. Bıbigúl Tólegenova
  6. Seıit Qasqabasov
Sońǵy jańalyqtar

Parıjge syımaǵan Pol

О́ner • Búgin, 21:16

Baıaǵy jartas – sol jartas...

Sport • Búgin, 21:15

Eshkimnen jeńilmegen sańlaqtar

Sport • Búgin, 21:11

Qarttar úıindegi vals

Qoǵam • Búgin, 21:05

«Barys» jańa oıynshymen tolyqty

Hokkeı • Búgin, 21:00

Aqtaýdaǵy «Dombyra-dastan» aksııasy

Aımaqtar • Búgin, 20:47

Dollar qaıta kóterildi

Qarjy • Búgin, 16:35

BQO-da Astana kúni atap ótiledi

Elorda • Búgin, 15:59

Uqsas jańalyqtar