Keńestiń jańa quramyna qoǵam belsendileri, jas ǵalymdar men kásipkerler, óńirlerdiń, aýyl jáne shyǵarmashyl jastardyń ókilderi, «Táýelsizdik urpaqtary» grantynyń ıegerleri, Prezıdenttik jastar kadrlyq rezerviniń músheleri, jastar uıymdarynyń kóshbasshylary kirdi.
Jıynda Erlan Qarın Memleket basshysy Joldaýynyń negizgi baǵyttaryna toqtaldy. Ol Prezıdent usynǵan reformalar memleket jańǵyrýynyń jańa kezeńi ekenin, Jańa Qazaqstandy qurý men jańa bastamalardyń bastaýy bolyp tabylatynyn atap ótti. Bul reformalar halyq arasynda, ásirese jastar ortasynda úlken qoldaýǵa ıe.
Bul rette Jastar keńesiniń róli artady. О́ıtkeni Keńes múshelerin zań jobalaryn, tujyrymdamalardy jáne basqa da strategııalyq qujattardy talqylaýǵa qatystyrý kózdelgen.
Qazirgi ýaqytta Parlament Májilisinde «Jastar saıasaty týraly» zań jobasy qaralyp jatyr. Erlan Qarın Keńes ókilderin Májilistegi jumys toptarynyń quramyna engizýdi usyndy. Budan bólek, Jastar saıasaty jónindegi keńestiń júıeli jumys isteýi úshin onyń janynan túrli komıtetter qurý josparlanǵan.
Jıynda QR Premer-Mınıstriniń orynbasary Eraly Toǵjanov, QR Bilim jáne ǵylym mınıstri Ashat Aımaǵambetov, Eńbek jáne halyqty áleýmettik qorǵaý mınıstri Serik Shápkenov jáne «Jastar» ǵylymı-zertteý ortalyǵynyń dırektory Ázız Ysqaqov baıandama jasady.
Kezdesý sońynda Keńes músheleri memlekettik organdardyń basshylaryna óz saýaldaryn qoıyp, usynystaryn aıtty.
