Alageýim

Tabıǵattan syr tartsańyz, janyńyz tazarady ne kóńi­lińizge shynaıy kórkem sýretter qonady. Tańsáride taýǵa shyqqan jolaýshydaı taza aýanyń juparyna mastanyp, qustaı qanatyńyzdy erkin sermegińiz keledi. Qarańyzshy, sol erkindik zamanaýı sýretshi Rashıd Qulbatyrovtyń «Tań» kartınasynda da bar. Ta­bı­ǵattyń tamashasyn kóz al­dy­ńyzǵa kóshirgen sheberdiń shy­ǵarmasy tumanǵa oranǵan tirshilikti terbep turǵandaı.

Jalpy, qylqalam sheberi beıneleý óneri keńistiginde ártúrli baǵytta jumys istep júrgen sýretshi. Ol meıli peı­zaj, janrlyq kartınalar, ult­tyq taqyryptaǵy týyn­dylar bolsyn, ártúrli kór­kem janrlarda jemisti eń­bektenip keledi. Dese de onyń súıikti janry – peızaj. Al shabytynyń qaınar bu­laǵy – arý Almaty. Nege deseńiz, qala peızajdary men Ile Alataýynyń landshaftaryn kóp jazǵan sýretshi osy qaladan áldebir rýhanı kúshtiń boıaýyn alady.

Baqsańyz, «Tań» kartı­na­­synda Alataý bókte­riniń qysty kúngi tańǵy kóri­nisin beınelegen. Aspan astynda úlbiregen bıik-bıik shyrshalar tizilip tur, al olardyń ar jaǵynan tús jaǵynan aspanmen tutasyp ketken taý kelbeti baıqalady. Ásem shyrshalardyń butaqtaryn qar basqan. Bul aǵashtarǵa tańǵajaıyp sıpat berip tur. Kúnniń aq jáne kógildir tús­ti balǵyn sáýleleri om­by qar men aǵashtardyń joǵar­ǵy ush­taryna baılanyp qalǵandaı.

Sýretshi aq, kógildir, kók tús­terdiń reńkterin paıdalana otyryp, salqyndyq pen aıazdy sezdiredi. Tipti, uıyt­qyp soqqan jeldiń qalaı qar jamylǵysyn kótergenin jáne kartınanyń ekinshi pla­­nyndaǵy munarda alyp shyrshalardyń birinen soń biri sozyla ornalasqanyn kórýge bolady.

Bul kartınadan bizdiń kóz aldymyzǵa jaıly tús, kómeski kóleńkeler, qysqy ormannyń únsizdigi, tynyshtyq pen úılesim keledi.