Polisia.kz saıtynyń málimetinshe, 26 naýryzda Ishki ister mınıstrligi, Ulttyq qaýipsizdik komıteti jáne Bas prokýratýrasy birlesip, sondaı-aq arnaıy jasaq bólimshesiniń qatysýymen Almaty qalasynda jáne Almaty oblysynda arnaıy operasııa ótkizdi. Onyń barysynda «Aıshýaq-Jantúgel» uıymdasqan qylmystyq tobynyń múshelerin ustady.
Top músheleri buǵan deıin birneshe ret qylmystyq jaýapkershilikke tartylǵan.
«Júrgizilgen arnaıy operasııanyń nátıjeleri boıynsha ustalǵandardan eki «Kalashnıkov» avtomaty, ańshylyqqa arnalǵan 5 sholaq myltyq, eki jaýyngerlik tapansha, «Kalashnıkov» pnevmatıkalyq avtomaty, «F-1» qorǵanys qol granatasy, oq ótpeıtin eki keýdeshe, ańshylyq pyshaq, túrli kalıbrli 350-den astam oq-dári, sondaı-aq 5700 AQSh dollary jáne 107 myń teńge somasyndaǵy aqshalaı qarajat tárkilendi», dedi polısııa qyzmetkerleri.
Qazirgi ýaqytta ustalǵan adamdardyń ózge de aýyr jáne asa aýyr qylmystarǵa, onyń ishinde qańtar aıynyń basynda oryn alǵan jappaı tártipsizdik kezinde jasalǵan qylmystarǵa qatystylyǵy tekserilýde.
