Sóziniń álqıssasyn «Qańtar qasiretiniń» sebepteri men saldaryna arnaǵan Memleket basshysy biraz túıindi oılaryn ortaǵa saldy. Odan arǵy oılaryn osy qasiretten sabaq ala otyryp, Jańa Qazaqstandy qurýdaǵy saıası reformalardyń tujyrymdamalyq negizdemelerin sala-salaǵa bólip tarata aıtty. Bul reformanyń júıeli keshendi sıpatta júzege asyrylatynyn eskertti. Elimizdegi basqarý júıesi prezıdenttik bılikke shoǵyrlanyp qalǵanyn tilge tıek ete kelip, budan bylaı «Kúshti prezıdent – Yqpaldy parlament, Esepti úkimet» degen úsh tarmaqty bılik júıesine jedel kóshý qajettigin kórsetti. Bul degenińiz prezıdenttik bıliktiń biraz bóligi Parlament pen Úkimetke beriletindigin bildiredi. О́kiletti bıliktiń barlyq satysynyń pármeni kúsheıip, qoǵamdyq uıymdarmen baılanys nyǵaıady. Ortalyq bıliktiń biraz qyzmeti óńirlerge berile otyryp, jergilikti jerdiń belsendiligin arttyrýǵa da basa mán beriledi degen sóz.
Árıne, Joldaýdan talaı astarly oılardy sýyrtpaqtaýǵa bolady. Eń bastysy, osy reformalardy daıyndaýda halyq pen qoǵamdyq ınstıtýttardyń usynys-tilekteri barynsha eskerilgendigin Prezıdent atap kórsetti. Sonyń nátıjesinen bolar, Joldaýda kórsetilgen kóptegen naqty is jurtshylyq kóńilinen shyqqanyna daý joq sııaqty. Máselen, ózimizge unaǵan onyń birqatar tujyrymdamasy mynalar: «Prezıdent ókilettigin barynsha shekteý», «Prezıdenttiń saıası partııany basqarýyn toqtatý», «bılikte otyrǵan Prezıdenttiń týǵan-týysqandarynyń saıası bılikke aralaspaýy, tipti kvazımemlekettik mekemelerdi basqarýǵa da qatyspaýy», «kásibı jáne majorıtarly saılaý júıesin engizý», «Máslıhattardyń rólin kóterý», «Saıası partııalardy tirkeýdi jeńildetý», «Saılaý júıesin jetildirý», «Azamattyq qoǵam ınstıtýttary men BAQ ókilderiniń pármenin arttyrý», «Konstıtýsııalyq Keńestiń Konstıtýsııalyq Sot bolyp ózgerýi», «Ulttyq Quryltaı» ınstıtýtyn qurý», t.b osyndaı tolyp jatqan jaqsy jańalyqtar bar. Solardyń ishinde barshanyń júregine jyly tıgen jańalyq Abaı oblysy, Jetisý oblysy, Ulytaý oblysy sııaqty tarıhı sanamyzǵa tańbalanǵan, qazaqy rýhymyzǵa serpin beretin kıeli óńirlerdiń jańasha órken jaıýy bolsa kerek. Bir sózben aıtqanda, Memleket basshysynyń bul Joldaýynyń árbir taraýy arnaıy áńgime jasaı otyryp saralaıtyn, el bolashaǵy úshin baǵdarlamalyq mańyzy bar tarıhı qujat deýge bolady.
Kenjehan MATYJANOV,
M.O.Áýezov atyndaǵy Ádebıet jáne óner ınstıtýtynyń bas dırektory,
Qazaqstannyń eńbek sińirgen qaıratkeri
