Atyraýdyń «Beıbarys» komandasyna aıyppul salyndy

Atyraý oblysynyń namysyn qorǵaıtyn «Beıbarys» hokkeı komandasyna 850 myń teńge kóleminde aıyppul salyndy. Bul týraly komanda dırektory Bolat Muhambetqalıev habarlady. Qazaqstan hokkeı federasııasynyń osyndaı sheshim qabyldaýyna «Beıbarys» pen qaraǵandylyq «Arystan» komandalary arasynda ótken kezdesýde kórermen tarapynan tártipsizdikke jol berilgeni sebep bolǵan. Oıyn tóreshisiniń sheshimine  narazylyǵyn tıyn shashýmen bildirgen jankúıerdiń ádepsizdigine baılanysty «Beıbarys» komandasyna aıyppul salyndy. -Federasııa sheshimimen tártip buzýshylyq saldarynan «Beıbarys» komandasyna 850 myń teńge aıyppul salyndy. Jáne sońǵy besinshi oıyndy basqa alańda ótkizýge sheshim qabyldandy. Tártipsizdik jasaǵan adamdy anyqtaý ústindemiz. Biraq kim ekenin, qaı jerde turatyny týraly maǵlumat joq. Anyqtaǵannan keıin quqyq qorǵaý organdaryna aryzymyzdy jazamyz, –deıdi «Beıbarys» hokkeı komandasynyń dırektory Bolat Muhambetqalıev. Eske sala keteıik,  atyraýlyq «Beıbarys» komandasy bes jyl buryn qurylǵan. Osy kezeńde atalǵan komanda el chempıonatynyń eki altyn jáne eki kúmis júldesine ıe boldy. Al bıylǵy chempıonatta  qola júldege qol jetkizýdi kózdep otyr. Joldasbek Shópeǵul. Atyraý oblysy. Derekkóz: Atyraý oblysynyń «Beıbarys» hokkeı komandasy. Foto: www. dmk. kz.