Bul bastama pedagogıkalyq joǵary oqý oryndary men bitirýshi túlekteri úshin jaýapty qadam bolmaq. Osy oraıda bilim alýshylardy daıyndaý salalyq joǵary oqý oryndarynyń mindeti.
Ulttyq biliktilik testileýin ótkizý erejeleri men sharttary boıynsha aqparattyq-túsindirý jumystaryn júrgizý maqsatynda Abaı atyndaǵy QazUPÝ Basqarma tóraǵasy - rektor Darhan Bilálov Town Hall formatynda ýnıversıtet stýdentterimen kezdesý ótkizdi. Is-sharaǵa akademııalyq máseleler jónindegi prorektor Maqtaǵalı Bektemesov jáne departament dırektorlary qatysty.
Darhan Bilálov bul úrdistiń bolashaq pedagogtar úshin mańyzdylyǵyn atap ótti.
«Biz bolashaq pedagogtardy daıarlaımyz, biz úshin olardyń joǵary sapaly bilimi mańyzdy. Qurmetti bilim alýshylar! Elimizdiń bolashaǵy sizderge baılanysty. Sondyqtan árbir túlek UBT-ǵa jaýapkershilikpen qaraýy kerek. Ýnıversıtetimizdiń professorlary men oqytýshylary sizderge bilim berdi, kásibı tájirıbelerimen bólisti. Ulttyq biliktilik testine daıyndalý úshin barlyq resýrstardy paıdalaný kerek. UBT-dan stýdentterimiz ótýi úshin ýnıversıtet tarapynan barlyq qajetti jaǵdaılar jasalǵan», dedi rektor. Túlekterdi jumysqa ornalastyrý ýnıversıtettiń mańyzdy mindetteriniń biri. Búginde bul kórsetkish 96 paıyzdy qurap otyr.
Bilim berý sapasyn arttyrý pedagogterdiń kásibıligimen tikeleı baılanysty, árbir bilim berý uıymynyń tıimdi jumysynyń negizi ekeni basa aıtyldy. Sondyqtan bolashaq muǵalimderdiń biliktilik deńgeıin anyqtaý quraly retinde bul testileýdiń mańyzy zor.
Maqtaǵalı Bektemesov pedagogıkalyq kadrlardy daıarlaý sapasyn kúsheıtýge baǵyttalǵan UBT tapsyrý erejeleri men sharttary týraly, bitirýshi kýrs stýdentteri úshin jańashyldyq pen aıqyn maqsattylyǵy týraly aıtyp berdi. Al bolashaq pedagogtar UBT testin tapsyrǵannan keıin mektepterge jumysqa qabyldanatyn bolady.
Abaı ýnıversıtetiniń Testileý ortalyǵy UBT-ǵa daıyndalý maqsatynda bitirýshi kýrs bilim alýshylarynyń synaq testileýin iske qosty. Olardyń árqaısysy yńǵaıly ýaqytta, kez kelgen jerde, kez kelgen qurylǵydan arnaıy pán men pedagogıka, oqytý ádistemesi boıynsha synaq testileýden óte alady. Ýnıversıtet kitaphanasy Ulttyq biliktilik testileýine daıyndalý úshin oqý-ádistemelik keshendermen (oqý pánderi, pedagogıka, oqytý ádistemesi) jabdyqtalǵan.
Kezdesý barysynda stýdentter ózderin tolǵandyrǵan suraqtarǵa jaýap alyp, pikirlerimen bólisti.
