«Júrgizilgen zertteýlerge sáıkes, aýrý juqtyrǵan 38 adamnan tabylǵan zertteý nátıjeleri vırýstyń COVID-19 omıkron nusqasy ekenin kórsetti», deıdi Beıjiń qalalyq profılaktıka jáne aýrýlardy baqylaý ortalyǵy basshysynyń orynbasary Pan Sınho.
Jańadan tirkelgen naýqastar men budan buryn anyqtalǵandar arasynda epıdemııalyq baılanys bary tabylǵan. Epıdemııalyq taldaý, genderdiń rettiligi men antıdenelerdiń anyqtalýy nátıjesinde belgili bolǵanyndaı, qazirgi ýaqytta Beıjińde ınfeksııa juqtyrýdyń eki tizbegi bary aıtyldy.
Beıjiń aýdandarynyń biri COVID-19 taralý qaýpi joǵary, al qalǵan jeti aýdan ortasha qaýiptegi aımaq retinde jiktelgen. Sońǵy derekterge sáıkes COVID-19 aldyn alý jáne qarsy kúres jónindegi qalalyq shtab Qytaı astanasynda 2 aımaq joǵary qaýipti jáne 12 aımaqtyń qaýiptiligi ortasha dep jarııalady. Buǵan deıin Beıjiń bıligi taǵy 22 adamnyń vırýs juqtyrǵany anyqtalǵannan keıin, epıdemııaǵa qarsy sharalardy kúsheıtken edi.
Jaqynda tipti vırýstyń taralýyn azaıtý úshin Qytaı astanasyndaǵy mektepterde sabaq berý toqtatyldy. Beısenbi kúni tańerteń beıjińdik Chaoıan aýdanyndaǵy jekemenshik mektepterde bilim alýshylardyń ata-analaryna oqý oryndary qashyqtan oqytý rejimine kóshkeni týraly shuǵyl habarlama keldi. Jergilikti BAQ-tyń habarlaýynsha, mundaı sharalar qalanyń basqa aýdandaryndaǵy birqatar bastaýysh jáne orta mektepterde engizile bastaıdy. Sondaı-aq Týnchjoý aýdanyndaǵy balabaqshalar jumysy toqtatylǵan. 27 sáýirdegi jaǵdaı boıynsha mektep oqýshylary arasynda COVID-19 ınfeksııasyn juqtyrý sany artyp keledi. Beıjińniń Chaoıan aýdanyndaǵy mektepterdiń birinde 36 oqýshynyń indet juqtyrǵany anyqtalǵan. QHR Gıgıena jáne densaýlyq saqtaý memlekettik komıtetiniń málimetinshe, sońǵy táýlikte Beıjińde koronavırýs ınfeksııasyn juqtyrǵan 50 jaǵdaı tirkelgen. Dúısenbiden bastap bılik Qytaı astanasy aýdandaryndaǵy birqatar turǵyndy jappaı testileýden ótkizip jatyr. Osylaısha Qytaı bıligi vırýsty tolyǵymen joıý úshin qatal sharalar engizý týraly sheshim qabyldaǵan.
