Moldabekovanyń sózinshe, sáýirde jahandyq qarjy naryǵyndaǵy belgisizdik pen qubylmalylyqqa qaramastan, teńge 4,6 paıyzǵa deıin nyǵaıdy.
«Sáýirde shetel valıýtasyna suranystyń aıtarlyqtaı tómendegeni baıqaldy. Qazaqstan qor bırjasynda saýda-sattyqtyń ortasha kólemi 179 mıllıon dollardan 92 mıllıon dollarǵa deıin tómendedi. Shetel valıýtasyna suranystyń tómendeýi, eń aldymen, logıstıkalyq tizbekterdiń toqtatylýy jáne jetkizýdegi yqtımal úzilister nátıjesinde ımporttyń, onyń ishinde Reseı ımportynyń tómendeýine baılanysty boldy. Sonymen qatar qazirgi jaǵdaıdy eskere kele, Reseı Federasııasynyń belgili bir ónim túrleriniń eksportyna shekteý sharalaryn qoldaný jaǵdaıynda ımportty basqa naryqtarǵa qaıta baǵyttaýǵa bolady, bul belgili bir ýaqytty qajet etedi», deıdi ol.
Ulttyq bank tóraǵasynyń orynbasary syrtqy naryqta belgisizdiktiń saqtalýy naryq qatysýshylary belsendiliginiń tómendeýine yqpal etetinin eskertti.
«Jalpy alǵanda, naryqtaǵy sentıment ózgerip, jeke tulǵalardyń tarapynan suranys turaqtandy, bul da teńgeniń baǵamyna oń áser etedi. Teńgedegi aktıvterdi qorǵaý sharalary jáne Ulttyq banktiń mólsherlemeni 14 paıyzǵa deıin kóterýi – qarjy naryǵynyń turaqtylyǵyn qamtamasyz etýge jáne teńgedegi depozıtterdiń tartymdylyǵyn qoldaýǵa yqpal etedi», dep qosty ol.
Sonymen qatar Moldabekova sáýirde Ulttyq banktyń valıýtalyq ıntervensııa júrgizbegenin qosty.
«Ulttyq valıýta baǵamynyń qysqa merzimdi aýytqýlary bolǵan jaǵdaıda satý jaǵynan, sol sııaqty satyp alý jaǵynan Ulttyq bank valıýtalyq ıntervensııa jasamady. Ulttyq bank teńgeniń qalypty qubylmalylyǵyn shektemeıdi», deıdi ol.
Ulttyq bank jyl basynan beri ulttyq valıýtanyń álsireýi nebári 0,2%-dy quraǵanyn jarııalady.
