QR Úkimeti basshysynyń baspasóz qyzmetinen málim etkendeı, qazaqstandyq delegasııa Tegeranda Iran Islam Respýblıkasynyń (IIR) basshylyǵymen saýda-ekonomıkalyq yntymaqtastyqty keńeıtý jáne eki el arasyndaǵy tranzıttik áleýetti jandandyrý máseleleri boıynsha kelissóz júrgizdi.
IIR-diń birinshi Vıse-prezıdenti Mohammad Mohbermen kelissóz barysynda qazaqstandyq tarap Iran aýmaǵy arqyly «Soltústik-Ońtústik» baǵyty boıynsha, keıinnen Parsy shyǵanaǵy, Afrıka, Ońtústik Azııa elderine jáne basqa da óńirlerge, onyń ishinde mýltımodaldyq júk tasymaldaryn paıdalana otyryp, júkterdi tasymaldaýdy ulǵaıtýǵa múddeliligin rastady.
Qazaqstan-Iran kólik yntymaqtastyǵyn keńeıtýdiń mańyzdylyǵy týraly aıta kele, Iran tarapy kólik-logıstıkalyq yntymaqtastyqty damytý jónindegi kelissózderdiń jemisti sıpatyn atap ótti. IIR birinshi Vıse-prezıdenti M. Mohber osy maqsattarǵa qol jetkizý Iran men Qazaqstandy mańyzdy óńirlik habqa aınaldyra alatynyn atap ótti.
Eki tarap ta sońǵy jyldary taýar aınalymy ósiminiń jaqsy serpini baıqalyp otyrǵanyn atap ótti. Sonymen qatar Iranmen saýdadaǵy qazirgi halyqaralyq shekteýler kezinde de áleýet eleýli bolyp qalýda. Mysaly, tamaq ónerkásibinde Qazaqstan astyq, kondıterlik jáne un ónimderiniń, et jáne et ónimderiniń, sondaı-aq janýarlardan alynatyn basqa da ónimderdiń eksportyn ulǵaıtýǵa daıyn.
Bul rette, Qazaqstanda Iran jemis-kókónis ónimine suranys bar. Kelissózder barysynda taraptar ónerkásiptik kooperasııa salasyndaǵy yntymaqtastyqty arttyrý máselelerin de talqylady. Aýyl sharýashylyǵy ónimderin qaıta óńdeý salasyndaǵy birlesken jobalardy, mysaly, aýyl sharýashylyǵy shıkizatyn qaıta óńdeý jónindegi jobalardy iske asyrý úshin úlken múmkindikter bar ekeni atap ótildi.
Budan bólek, saýda, aýyl sharýashylyǵy, densaýlyq saqtaý, munaı, kólik jáne qalalyq damý mınıstrlikterinde, sondaı-aq temirjol ákimshiliginiń, Ulttyq banktiń, ulttyq munaı kompanııasynyń basshylyǵymen, Saýda-ónerkásip palatasynyń jáne eldiń keıbir provınsııalarynyń ókilderimen kezdesýler ótti.
