«Jobanyń negizgi maqsaty – otbasy medısınasynda, ınfeksııalyq jáne ınfeksııalyq emes aýrýlarmen kúreste, dárigerlerdi oqytý isinde jáne ana men bala ólimin azaıtý baǵytynda tájirıbe almasý. Qazir atalǵan kelisim memlekettik organdardyń maquldaýynda jatyr», dep jazylǵan vedomstvo málimetinde.
Qujattyń taǵy bir baǵyty boıynsha aýrýhanalardy basqarý, farmasevtıka, medısınalyq buıymdar men qondyrǵylar óndirisi, vaksına ázirleý jáne kosmetıkalyq ónim shyǵarý isi salasynda aqparat jáne tájirıbe almasý kózdelip otyr. Sondaı-aq medısına personalynyń áleýetin arttyrýǵa baǵyttalǵan qysqa merzimdi trenıngter ótkizý, sarapshylar men keńes berý qyzmetin almasý, densaýlyq saqtaý salasyndaǵy adam kapıtalyn damytý boıynsha áriptestikti nyǵaıtý josparlanyp otyr.
Aıta keteıik, QR Prezıdentiniń Túrkııa memlekettik sapary aıasynda eki eldiń basshylary keńeıtilgen strategııalyq seriktestik jóninde málimdeme jasaǵan edi. Ol málimdemede taraptar syrtqy saıasat, qorǵanys jáne qaýipsizdik, ekonomıka, saýda, ınvestısııa, ónerkásip, taý-ken ónerkásibi, ǵylym jáne tehnologııa, kólik, aqparattyq-kommýnıkasııalyq tehnologııalar jáne kıberqaýipsizdik, energetıka, qorshaǵan orta jáne ýrbanızasııa, densaýlyq saqtaý, otbasy jáne áleýmettik qyzmetter, azyq-túlik, aýyl sharýashylyǵy, apattar men tótenshe jaǵdaılar, bilim berý, buqaralyq aqparat quraldary men kommýnıkasııalar, mádenıet, týrızm, sport, arhıv salalaryndaǵy yntymaqtastyq pen úılestirýdi tereńdetý jáne osy baǵyttaǵy ekijaqty yntymaqtastyq tetikterin ulǵaıtý arqyly olardy barynsha paıdalanýǵa kelisim jasalǵany aıtylǵan.
