Buǵattalǵan shottyń sheshimi

Sonyń ishinde «Sberbank Qazaqstannyń» – 2,7 mlrd, «Alfa-Banktiń» – 6,2 mlrd jáne «VTB Qazaqstannyń» 0,3 mlrd teńgesiniń qozǵalysyna tyıym salynǵan. Sonymen qatar sheteldik qarjy uıymdary «Sberbank» AQ jekelegen klıent­teri boıynsha 2,9 mlrd teńge kólemindegi sheteldik valıý­tadaǵy tólemderdi buǵat­qa salǵan. «Alfa-Bank» klıent­teriniń sheteldik valıý­tadaǵy tólemder men aýdarymdaryna qatysty 3,9 mlrd teńgesi de aınalymǵa shyǵa almaıdy.

Qarjy naryǵyn retteý jáne damytý agenttiginiń basshysy Mádına Ábilqasymovanyń aıtýynsha, qazir «Alfanyń» jańa aksıoneri – «Bank SentrKredıt» bankti AQSh jáne ózge de elderdiń sanksııalyq tiziminen shyǵarýǵa tyrysyp jatyr.

«VTB Qazaqstan» klıent­teri­ne qatysty tólem jáne aýdarym aıasynda qarajatty buǵattaý nemese qatyryp qoıý faktileri joq. 2022 jylǵy 1 mamyrdaǵy jaǵdaı boıynsha «Sberbank» AQ jáne «Alfa-Bank» AQ sheteldik bankter qaıtarǵan klıent qarajatynyń somasy týraly aqparat joq. О́ıtkeni tranzaksııalar júrgizilgen bankterdiń korrespondenttik shottary buǵattalǵan. Tyıym salynǵan qarajatty qaıtarýdy klıentter basqa bankter arqyly júzege asyrady», dedi M.Ábilqasymova.

Operasııalardy buǵattan sheshý úshin bank klıentteri OFAC (AQSh Qarjy mınıstr­ligi­niń sheteldik aktıvterdi baqylaý basqarmasy) resmı saıtyna kirip, ınternet-resýrstaǵy arnaıy formany toltyrsa bolady. Qazir bankter klıentterge kontragent bank­termen kelissózder júrgizý jáne tıisti ótinishterdi daıyndaý arqyly olardyń qarajatyn qaıtarýǵa járdem kórsetip jatyr. «Bank SentrKredıt» qazaqstandyq «Alfa-Bankti» SDN (AQSh azamattarymen birlesip bıznes jasaýǵa ty­ıym salynǵan tulǵalar tizimi – red) tiziminen shyǵarýǵa ótinish qylyp, OFAC-qa hat joldaǵan. OFAC maquldaǵan soń baryp «Alfa-Bank» klıentteriniń qarajaty men korrespondenttik shottary tolyqtaı buǵattan sheshiledi.

«Sheteldik bankterdiń kor­res­pondenttik shottarynda or­nalasqan «Sberbank» AQ jáne «Alfa-Bank» AQ qaraja­tyn buǵattaý jáne olardyń klıent­teri­niń qarajatyn buǵat­taýǵa qatysty qazirgi jaǵdaı Qazaq­stannyń bank sektory betpe-bet kelip otyr­ǵan syrtqy geosaıası ahýalmen tikeleı baılanysty. Eger osyǵan baılanysty klıentter eki bankke zalaldy óteý týraly azamattyq talap-aryz túsirse, sot organdarynyń sheshimderine sáıkes bul talaptardy bankter qanaǵattandyrýǵa tıis», dep túsindirdi agenttik basshysy.

Eske salaıyq, osyǵan deıin «Alfa-Bank» AQ-ty qazaq­stan­dyq «Bank SentrKredıt» tolyq­taı satyp alyp, ony Eco Center Bank dep qaıta ataǵan­daryn jarııalady. Al «Sberbank» AQ qazaqstandyq Halyk Bank-ke 330 mlrd teńge kólemindegi nesıe portfelin satty. Ekijaqty kelisim aıasynda Qazaqstan damý banki arqyly berilgen jeńildetilgen avtonesıe kredıtteri, kepilsiz kredıtter jáne ıpotekalyq nesıe ótken. Sondaı-aq eki qarjy ıns­tıtýty arasynda shaǵyn jáne orta bıznes sektoryndaǵy 7 500 kásiporynǵa zaım berý týraly kelisim jasaldy. Soǵan sáı­kes «Sberbank Qazaqstannyń» 105 mlrd teńge kólemindegi kom­mersııalyq portfeli jáne «Damý» qorynyń memlekettik baǵdarlamasy aıasynda berilgen 4,9 mlrd teńge kólemindegi ne­sıe­leri Halyk Bank-ke aýysty.

Ázirge «Sberbank Qazaq­standy» qaı ınvestordyń satyp alary belgisiz. Buǵan deıin «Báıterek» holdıngi satyp alýy múmkin degen aqparat taraǵan. Alaıda keıbir sarapshylar memlekettiń bank sektoryna aralasýy abyroı ákelmeıtin qadam degendi aıtady. Jaqynda Al­ma­tyda brıfıng ótkizgen «Eý­ra­zııa­lyq bank» basqarma tór­aǵa­sy Valentın Morozov «Alfa-Bankti» satyp alýdy oılas­tyrǵanyn, biraq keıin bul sheshimnen bas tartqandaryn málimdedi.

«Biz «Alfa-Bankti» qaras­tyr­dyq. Nátıjesinde, aqsha men energııany odan da bizdiń bankti organıkalyq turǵydan damytýǵa jumsaıyq dep sheshtik. Tipti onyń nesıe portfeline qatys­ty dıskont bolsa da solaı sheshim qabyldadyq. «VTB Qazaqstandy» múlde qaras­tyrǵan joqpyz. Al «Sberbank Qazaqstandy» satyp alýǵa aqshamyz jetpeıdi dep oılaımyn. Ony qalaıda satyp alady – aktıvteri jaqsy, óte jaqsy komandasy bar», deıdi V.Morozov.

О́z kezeginde Qarjy naryǵyn retteý jáne damytý agenttigi Re­seı­diń enshiles bankterinde qa­zaq­stan­dyqtardyń qarajatyn buǵat­taý týraly dáıeksiz aqparat­tyń taratylyp jatqanyn habarlady.

«Agenttik qarjylyq retteý­shi retinde klıentterdiń qaraja­tyn jáne enshiles reseılik bank­terdiń aktıvterin oqshaýlaý boıynsha eshqandaı sharalar qabyldaǵan joq jáne qabyldaýǵa quqyly emes. Agenttiktiń Reseı­diń enshiles bankterinen («Sber­bank Qazaqstan», «Alfa-Bank Qazaqstan» jáne «VTB Qazaqstan») alǵan aqparaty boıyn­sha, sheteldik bankter bank­terdiń sheteldik korrespon­dent-bankterdegi shetel valıý­tasyn­daǵy korrespondenttik shot­taryndaǵy qarajattaryn buǵat­taǵan. О́z tarapynan agent­tik banktermen birlesip, Reseı­diń enshiles bankteri klıent­teriniń buǵattalǵan qaraja­tyn qaıtarýǵa baılanysty jaǵ­daıdy qadaǵalaıtyn bolady», de­lingen Syrtqy kommýnıka­sııa­lar basqarmasynyń habarlamasynda.