Qazaqstan men Qyrǵyzstan kóshbasshylarymen qatar jıynǵa Armenııanyń Premer-mınıstri Nıkol Pashınıan, Reseı Prezıdenti Vladımır Pýtın, sondaı-aq Belarýs Premer-mınıstri Aleksandr Golovchenko men Eýrazııalyq ekonomıkalyq komıssııa alqasynyń tóraǵasy Mıhaıl Mıasnıkovıch beınebaılanys rejıminde qatysty. Bul is-sharany Reseı ónerkásipshileri men kásipkerleri odaǵynyń prezıdenti Aleksandr Shohın júrgizdi.
Is-sharaǵa qatysýshylar ıntegrasııany odan ári damytýdyń, Eýrazııalyq ekonomıkalyq odaq aıasynda energetıka, ónerkásip, kólik, qarjy jáne sıfrlandyrý salalaryndaǵy yntymaqtastyqty nyǵaıtýdyń perspektıvalaryna qatysty oı-pikirlerin ortaǵa saldy.
Qasym-Jomart Toqaev óz sózin EEO keńistigindegi ózara saýda-sattyqty arttyrýdyń perspektıvalaryna jáne Eýrazııalyq ekonomıkalyq komıssııanyń jumysyn jetildirýge arnady.
Memleket basshysy Eýrazııalyq ekonomıkalyq odaqtyń ıntegrasııalyq birigý úderisine qatysýshy memleketter arasyndaǵy erkin saýdany damytý maqsatynda tıisti jaǵdaı jasaý úshin qurylǵanyn aıtty.
«Eýrazııalyq ekonomıkalyq odaq kúrdeli geosaıası jaǵdaıda óziniń tıimdiligin kórsetti. Biz muny kórip otyrmyz. Eýropalyq odaqtaǵy jáne basqa da ekonomıkalyq uıymdardaǵy sııaqty bul Odaqta túrli máseleler týyndap otyratynyna tań qalýǵa bolmaıdy. Árbir memleket ulttyq múddesin ózdiginshe kózdeıdi. Árbir memleket týyndaǵan máseleni ózderi durys dep sanaǵan pikiri boıynsha sheshilgenin qalaıdy. Bul árbir halyqaralyq, ásirese saýdamen aınalysatyn uıymdarǵa tán jaǵdaı», dedi Qazaqstan Prezıdenti.
Sonymen qatar Qasym-Jomart Toqaev Eýrazııalyq ekonomıkalyq komıssııanyń qyzmeti jóninde de aıtty. Onyń pikirinshe, Komıssııa tabysty jumys istep jatyr.
«Búginge deıin Eýrazııalyq ekonomıkalyq komıssııa aıasynda ótkizilgen konsýltasııalar nátıjesinde kedergilerdiń 80 paıyzy joıyldy. Bul kúrdeli jumys jalǵasyn tabady dep úmittenemiz. Integrasııa – kóp eńbek sińirýdi jáne múshe memleketter arasynda ymyraǵa kelýdi qajet etetin úderis. Qazaqstan Eýrazııalyq ekonomıkalyq komıssııanyń naqty nátıjege jaı sózben emes, naqty ispen qol jetkizgenin qoldaıdy. Kez kelgen máseleni iskerlikpen sheshken jón. Sebebi halyqtarymyz bul máselelerdiń uzaq sozylǵanyn kútpeıdi, qazir sheshilgenin qalaıdy. Olar máseleni sheshýdiń durys joly osy dep sanaıdy», dedi Memleket basshysy.
Qasym-Jomart Toqaevtyń aıtýynsha, Qazaqstan eýrazııalyq ıntegrasııanyń iskerlik ári pragmatıkalyq negizde damyǵanyn jaqtaıdy.
Aıana Toǵanbek
