Bıyl mektep medısınasyna 26,1 mlrd teńge qarastyrylǵan

«2020 jyly mektep medısınasy qarjylandyrýdyń jeke baǵytyna shyǵaryldy. Sol kezde oǵan 18,5 mlrd teńge, al 2021 jyly – 22,2 mlrd teńge bólindi. Al bıylǵy jyly mektep oqýshylary úshin aldyn ala tekserý men saýyqtyrý is-sharalaryna 26,1 mlrd teńgege shart jasaldy» dep málim etti «Áleýmettik medısınalyq saqtandyrý qory» kommersııalyq emes aksıonerlik qoǵamy Nur-Sultan qalasy boıynsha fılıalynyń baspasóz qyzmetinen.

Balalar jeńildikke ıe sanatqa kiredi jáne memleket esebinen Mindetti áleýmettik medısınalyq saqtandyrý (MÁMS) júıesinde saqtandyrylǵan. Tegin qyzmetterdi balalar Medısınalyq saqtandyrý qorymen shart jasasqan medısınalyq uıymdardan ala alady.

Mektep medısınasy balalarǵa kómekti tikeleı bilim berý uıymdarynda, ıaǵnı mektepterde, balabaqshalarda, shaǵyn ortalyqtarda nemese basqa da bilim oshaqtarynda kórsetýdi kózdeıdi. Buryn mektep medısınasy ýchaskelik qyzmetke bólingen qarajat esebinen qarjylandyrylǵan. MÁMS júıesi engizilgennen keıin ol jeke pozısııaǵa shyǵaryldy.

«Bıyl qor bilim berý uıymdarynda medısınalyq qyzmet kórsetýge 436 emhanamen 26,1 mlrd teńgege jýyq somaǵa shart jasady. Salystyra qarasaq: 2020 jyly mektep medısınasynyń qyzmetin 417 medısınalyq uıym, 2021 jyly – 430 medısınalyq uıym kórsetti, sharttardyń quny 22,2 mlrd teńgeni qurady. Aldyn ala qorytyndy boıynsha, 2022 jyldyń 1 toqsanynda shamamen 6,4 mlrd teńgege mektep medısınasy qyzmeti kórsetildi», delingen baspasóz baıanynda.

Mektep medısınasynyń máni – bilim berý uıymdaryndaǵy balalardy qajetti medısınalyq qyzmettermen qamtamasyz etý. Bul jumys mektep nemese balabaqsha ornalasqan aýmaqqa qarasty emhana jaýapkershiliginde bolady. Ol úshin mektepte medısına qyzmetkeriniń jabdyqtalǵan kabınetteri bar arnaıy qyzmet qurylady. Profılaktıkalyq tekserý nemese vaksınasııa júrgizý úshin mektepke (nemese balabaqshaǵa) tıisti profıldegi dárigerler keledi.

Mundaı is-sharalar aldyn ala josparlanady jáne ata-analarǵa kúni buryn habarlanady. Mektep medısınasynyń tarıfine vaksınasııa, jyl saıynǵy profılaktıkalyq tekserý, tis dárigeriniń tikeleı oqý ornynda júrgizetin tekserýi kiredi. Sondaı-aq oqý ornyndaǵy dárigerler balalarǵa salaýatty ómir saltyn ustaný jóninde is-sharalar ótkizedi. Eger kásibı tekserýde patologııa anyqtalǵan bolsa, onda bala tirkelgen jeri boıynsha emhanaǵa tereńdetilgen medısınalyq tekserýge jiberiledi.

Balalardy vaksınalaý ata-ana kelisimimen Ulttyq egý kúntizbesi boıynsha júrgiziledi. Shuǵyl jaǵdaılarda medısınalyq pýnktide jedel járdem brıgadasy kelgenge deıin balalarǵa alǵashqy kómek kórsetiledi.