Aımaqtar • 28 Mamyr, 2022

Almatyda metronyń jańa stansııalary ashylady

26 ret kórsetildi

Almaty qalasynda «Saryarqa» jáne «Baýyrjan Momyshuly» metro stansııalary iske qosylady, dep habarlaıdy Egemen.kz ákimdiktiń resmı saıtyna silteme jasap.



Olar qazirgi qyzmet kórsetip turǵan toǵyz stansııanyń jalǵasy retinde qala ortalyǵyn shetki aýdandarmen baılanystyrady.

«Eki jańa stansııa iske qosylǵannan keıin metro jelisiniń jalpy uzyndyǵy 3,1 shaqyrymǵa uzaryp, endi 13,4 shaqyrymdy quraıtyn bolady. Jeli boıyna 7-10 mınýt saıyn júretin tórt vagondy 15 elektr poıyzyn jiberý josparlanǵan. Qazirgi tańda metro kúnine 45 myńǵa jýyq jolaýshy tasymaldaıdy. Jańa stansııalar iske qosylǵannan keıin bul kórsetkish kúnine 85 myń jolaýshyǵa deıin ósedi dep kútilýde», dep jazylǵan aqparat kózinde.

«Máskeýden» keıingi «Saryarqa» stansııasy Abaı dańǵyly boıynda Altynsarın dańǵyly men Saın kósheleriniń aralyǵynda – Family Park mańynda ornalasqan. Tereń salynǵan, eki kireberisi men bir vestıbıýli bar. Stansııada eki jedelsaty men segiz eskalator ornatylǵan. Interer jasaý kezindegi negizgi ıdeıa – Saryarqanyń sheksiz keń dalasynyń ásemdigin kórsetý. Qabyrǵalary mármár tastardan qurastyrylyp, granıtpen órnektelgen. Shetki jaǵyndaǵy qabyrǵada jazyq dalanyń ústinen shyǵyp kele jatqan kún, onyń bergi jaǵynda Qazaqstan astanasy beınesi mańynda shaýyp kele jatqan júırik attar beınelengen panno ornatylǵan.

«Baýyrjan Momyshuly» stansııasy Abaı dańǵyly boıynda Momyshuly kóshesiniń batysynda ornalasqan. Taıaz ornalasqan, eki vestıbıýl men alty kireberisi bar. Stansııada alty jedelsaty men on bes eskolator ornatylǵan. Platforma uzyndyǵy – 108 metr. Almaty metro jelisiniń on birinshi stansııasy ázirge sońǵy stansııa bolyp sanalady», delingen jazbada.

Stansııa úlken turǵyn alaptyń ortasynda ornalasqan. Qabyrǵalar men tireýishterdi bezendirý úshin ashyq reńkti marjan-sur tústi aǵash tektes keramıkalyq panelder, al edendi qaptaýǵa – ashyq sur tústi tabıǵı granıt paıdalanylǵan.

Saıttyń málimetinshe, bolashaqta «Qalqaman» stansııasy qurylysyn aıaqtap, metrony batys baǵytta «Barlyq» bazaryna deıin damytý josparlanǵan.

 

Sońǵy jańalyqtar

Dollar arzandady

Qarjy • Keshe

Uqsas jańalyqtar