Is-sharaǵa Qazaqstandaǵy Ázerbaıjan Respýblıkasy elshiliginiń, elordalyq etnomádenı ortalyqtardyń jáne jastar qanattarynyń ókilderi qatysty. Delegasııa etnomádenı birlestikterdiń kabınetterinde bolyp, etnostardyń kópǵasyrlyq tarıhymen jáne mádenıetimen tanysty.
Nur-Sultan qalasy ishki saıasat basqarmasynyń basshysy Dáýren Babamuratov meımanǵa etnosaralyq kelisimniń qazaqstandyq úlgisi týraly aıtyp, qatysýshylardy kitaptyń tusaýkeserimen quttyqtady.
Kitaptyń avtory – Ázerbaıjan tarıhshysy, saıasattanýshy, Ázerbaıjan SVS telearnasynyń «Syrtqy ister aspektileri» baǵdarlamasynyń júrgizýshisi, Ázerbaıjannyń dıasporalarmen jumys jónindegi memlekettik komıtetiniń sarapshysy Ataev Teımýr Oktaı ogly.
Tarıhnamada alǵash ret Abaıdyń oılaryn Quran aıattarymen salystyrýǵa talpynys jasaldy. Abaı ıdeıalaryn tolyq túsiný úshin avtor qazaq tarıhynyń mańyzdy betterine jáne oıshyl ómirbaıanynyń mańyzdy epızodtaryna júginedi. Onyń pikirinshe, bul Abaıdyń barlyq ýaqytta da ózekti joldaryn tereńirek túsinýge múmkindik beredi.
Ataev Teımýr Oktaı ogly óziniń quttyqtaý sózinde elimizdiń saıasatyn júzege asyrý úshin qurylǵan, álemde balamasy joq qoǵamdyq ınstıtýt – Qazaqstan halqy Assambleıasy týraly aıtyp, ádemi ǵımaratta etnomádenı birlestikterdiń qyzmetin damytý úshin barlyq jaǵdaı bar ekenin atap ótti.
Ázerbaıjan Respýblıkasynyń Qazaqstandaǵy elshiliginiń keńesshisi Kıazımov Rovshan Djavanshır ogly is-sharany uıymdastyrýshylarǵa alǵysyn bildirdi.
Kezdesý sońynda avtor Dostyq úıine kitaptar tabystap, oqyrmandarǵa qoltańba berdi.
