Jıyndy júrgizgen Abaı akademııasynyń dırektory, fılologııa ǵylymdarynyń kandıdaty Jandos Áýbákir aldymen atalǵan ǵylymı-zertteý ınstıtýtynyń atqarǵan jumystaryna qysqasha toqtalyp ótti.
«Uly aqynnyń 175 jyldyq mereıtoıy qarsańynda L.N.Gýmılev atyndaǵy Eýrazııa ulttyq ýnıversıteti janynan «Abaı akademııasy» ǵylymı-zertteý ınstıtýty ashyldy. Búginde bul akademııa elimizdegi irgeli ǵylymı ortalyqtardyń birine aınalyp úlgerdi, Abaı murasyn túrli qyrynan zerdelegen kóptegen ǵylymı jınaqtardy jaryqqa shyǵardy. Máselen, 2020 jyly 21 kitap, 2021 jyly 24 ǵylymı-tanymdyq zertteý eńbekteri basyldy. Bıyl da bul jumystar jalǵasýda» deı kelip ǵalym, aqyn shyǵarmalaryndaǵy halqymyzdyń ómir saltyn arqaý etý arqyly adamzattyń bolmysyn, tirshiliktiń mánin paıymdaǵan qyrlaryn sóz etti.
Jıyn barysynda onlaın baılanysqa shyqqan Ál-Farabı atyndaǵy Qazaq ulttyq ýnıversıteti janyndaǵy Abaı ǵylymı zertteý ınstıtýtynyń dırektory, fılologııa ǵylymdarynyń doktory, professor Jańǵara Dádebaev aqyn shyǵarmalaryndaǵy tirshilikke, tanymǵa baılanysty sózderdiń qoryn anyqtaý jáne qoldaný mánisin paıymdaý úlken ǵylymı másele ekendigin aıtty.
«Bul salada bizdiń iri ǵalymdarymyzdyń pikir aıtyp, ǵylymı túsinik berip júrgeni kóp. Abaı shyǵarmalarynyń túrli basylymdarynyń sońynda beriletin ǵylymı túsinikter aınalasynda túrli oılar men pikirler jınaqtaldy. Biraq áli ashylmaǵan jaılar kezdesedi. Bizdiń zertteýshilerimizdiń birqatary bul sózderdi burynǵy qalpynda qabyldap, ózderiniń oılaryn sol baǵytta ári damytýda. Osy tarapta jańa pikir men jańa kózqaras aıtyp júrgen ǵalymdar da bar. Qysqasy, bul baǵytta atqarylatyn jumys áli kóp. Biraz ǵylymı jobalar kópshilik nazaryna usynylǵan joq. Ol oılardy, boljamdardy aıtý keıde artyq bolýy múmkin. Sondyqtan bilikti mamandar toptasa otyryp, belgili bir pikirge kelýge tıis», dedi ǵalym.
Sondaı-aq Jańǵara Dádebaev aqynnyń «Kúz» degen óleńindegi «Qaz, tyrna qatarlanyp qaıtsa bermen, Astynda aq shomshy júr, ol – bir kerýen» degen shýmaǵyndaǵy «aq shomshy» degen sózge baılanysty túsinik Abaı shyǵarmalarynda burynnan qaıtalanyp kele jatqandyǵyn mysalǵa keltirdi. Belgili ǵalym, professor Qanıpash Mádibaeva asqan oıshyldyń tildik tulǵasyn taný úshin aqyn ómir súrgen dáýir men kezeńniń ǵylymı sıpattamasy qajet ekendigin jetkizdi.
Sonymen qatar is-sharaǵa Erlan Saılaýbaı, Maqsat Alpysbek, Muhıt Ábikenov, Nurzııa Ábdikárimova, Ilııas Qurmanǵalıev, Altynaı Asqarova, Almagúl Qajymurat jáne taǵy basqa tanymal ǵalymdar qatysyp, aqyn shyǵarmalaryn jańa qyrynan taldap, abaıtaný máselesi boıynsha oı-pikir almasty.
