Qazaqstannyń Eńbek sińirgen sport sheberi, halyqaralyq týrnırlerdiń birneshe dúrkin chempıony, «Qazaqstan barysy», «Álem barysy» Aıbek Nuǵymarov Semeıdegi №178 ýchaskede daýys berdi.
«Osy referendýmnan keıin bizdiń elimizdi úlken ózgerister kútip tur. Men búgin óz tańdaýymdy jasadym. Adamdardyń ýchaskelerge kóterińki kóńil-kúımen baryp jatqany qýantty», deıdi oblystyq máslıhat depýtaty, Semeı Kólik kolledjiniń dırektory Aıbek Nuǵymarov.
Semeıde aýa-raıynyń qolaısyzdyǵyna qaramastan halyqtyń joǵary belsendiligi baıqalady. Qaladaǵy saılaý ýchaskelerinde Qazaqstannyń ataqty fýtbolshylary da óz tańdaýyn jasady.
«Biz Andreı Karpovıchtiń dostarynyń fýtbol merekesine Semeıge arnaıy kelgen edik. Búgin elimiz úshin aıtýly kún. Árbir azamat óziniń daýysy arqyly elimizde bolatyn ózgeristerge óz úlesin qosýǵa múmkindigi bar. Sondyqtan biz osy múmkindikti paıdalanyp, Semeıdegi saılaý ýchaskesinde daýys berdik», dedi fýtboldan Qazaqstannyń úsh dúrkin chempıony Davıd Lorııa.
Sondaı-aq dańqty jerlesterimiz Samat Smaqov pen Andreı Karpovıch te saıası naýqannan tys qalmady.
«Keshe biz tamasha fýtbol merekesin ótkizdik. Búgin – tarıhı kún. Konstıtýsııaǵa engiziletin ózgeristerge árbir azamat óz úlesin qosa alady. Týǵan qalama kelip daýys bergenime qýanyshtymyn», dep túıindedi oıyn ataqty fýtbolshy Andreı Karpovıch.
Búgin Altaı aýdanynda alǵash ret paýerlıftıngten sport sheberi, halyqaralyq, respýblıkalyq, oblystyq jarystardyń qatysýshysy Ámına Volchenko da daýys berdi.
«Elimizdiń basty zańy retinde Konstıtýsııaǵa aıtarlyqtaı ózgerister men tolyqtyrýlar engiziledi. Bul azamattarǵa óziniń azamattyq ustanymyn kórsetýge tamasha múmkindik», deıdi Ámına.
